IPAR AMERIKA. Ikasturte hastapen trinkoa Diasporan, hasteko Ipar Amerikan; aurten Chinoko piknika iragan igandean izan baita, igandez beti, aitzineko egunean pilota partidak Aphessetchetarren trinketean, eta astelehenean Centro Basco ostatuan. Joan den astean aipatzen genituen kantari, pilotari eta bisitarieri emendatu behar zakote Xabier Euzkitze eta bere seme Aner Euzkitze, Mike Bidart eta lagun gehiagoz inguratuta mementu goxoak pasatzen bertso berrien eta euskal aire xaharren artean. Baina heldu den asteburuan ere programa betea du Amerika iparreko diasporak, ebiakoitzean "Euskal Besta" eginen baitute Montrealen Quebec-eko Euskaldunak elkarteko lagunek, komitatuen artean Maider Cigarroa kantari senpertarra, aste huntan Montrealeko taberna batean kantari, eta ondokoan New Yorken, hiriko Eusko Etxearen eskutik. Haatik, ber denboran, New London-en, Connecticut estatuan, itsaso ondoan, heien "Basque Fest" eginen dute "New England Basque Club"-ekoek, aurten gomitatu dituztela Jean Flesher NABOko lehendakaria eta bere banda Amerikanuak, eta Boiseko Oinkariko dantzariak. Eta hurbil, Mikelunen, "Txoko Berri" pilota txapelketa.

DIASPORAREN EGUNA. Gehienetan ez da batere aise diasporan agitzen diren guziak txoko huntan islatzea. Are gutiago aste huntan, munduan barna hamaika baitira euskal etxeek eginen dituzten ekitaldiak, igandean Euskal Diasporaren Eguna ospatuko baita nazioartean, Euskal Herrian aurten instituzionalki Gipuzkoako Oñatin eginen da ekitaldia, lehenengoz Pradales lehendakari berria buru (ospaturik ber denboran 50 urte betetzen dituela 1974an bertan AEBko ikasle euskal amerikarrez egin zen lehenengo ikastaldi luzeak, Par Bieter irakaslea tarteko) eta munduan zehar, andana bat euskal etxek eginen dituzten ekitaldien eskutik, aldarrikatuz eta galdeginik Euskal Herriak diaspora duela, eta diaspora horrek galdegiten duela bere lekua euskal kulturaren eta Euskal Herriaren baitan. Anitz izanen dira munduan hitzordu honetan bat eginen duten ekitaldiak, Parisetik Sydneyra, Madriletik San Frantziskora, Txileko Santiagotik Buenos Aires, Montevideo, Mexiko eta Salt Lake Cityraino. Zorionak diasporako lagun guzieri!