Azalekoa | 2024ko Abenduaren 12a
Alki kooperatiba Itsasutik Larresorora
A.E.
Lau hamarkada baino gehiago Itsasuko egoitza historikoan iragan ondotik, Alki kooperatibak Larresorora salto egin du, zero energiako tailer berrira. Azaro hondarrean, Larresoron eraiki "Lantokia" tailer berriaren estreinaldia iragan da, Eñaut Jolimon de Haraneder Alki kooperatibako zuzendari nagusia bertan zelarik.
Kooperatibaren hasierak
Alki 1981ean sortu zen, eta Euskal Herriko ekonomiaren eta kulturaren garapenaren alde aritzen den kooperatiba militantea izan da hasieratik. Biztanleak Euskal Herritik kanpo lanaren xerka joaten zirela ikusirik, bost lagunek beren energiak eta itxaropenak bateratzea erabaki zuten, herrian bertan enpleguak sortzeko eta Euskal Herria garatzen laguntzeko. Alkik industria eremuetatik kanpo atzeman zuen aterpe, lehen tailerra Itsasun plantatu baitzuen. Egun, Alki Larresorora mugitu da eraiki duen "Lantokia" tailer berrira.
Artisautza eta industriako teknikak uztartuz, zur hutsaren lanean trebetasun zinez berezia atxikitzen du eta aldi berean, funtsezko giza balioen alde egiten du, bai enpresan bertan, baina bai bezeroekin eta partaideekin ere. Sorkuntza garaikideak proposatzen ditu, lagunarteko giroa, freskotasuna eta ausardia islatzen dituztenak.
Alkiren zero energia tailer berria
Leibar & Seigneurin agentziak sortu duen 8.260mÀ‚'²-ko tailer berria eredugarria da energia eraginkortasunean eta soiltasunean. Ekoizpen eraginkor eta iraunkorrerako tresna gisa pentsatua, toki honek bertan lan egiten duten kooperatiba kideentzat, bezeroentzat eta mundu osoko kuriosentzat inspirazio iturri izatea du helburu. Tailer berri horren eraikuntza etapa garrantzitsua da kooperatibarentzat, hazkuntza eta bezeroak laguntzeko manera delako eta aldi berean etorkizunera begiratzeko manera baita. Tailer berritzaile honek artisautzaren eta lankideen trebetasunaren adierazle den puntako teknologiaren arteko lotura indartzea ere ahalbidetuko du, beti ere bezeroen zerbitzuko. Tailer berriaren eraikitzearekin markaren fabrikatze prozesuak berrikusteko eta hobetzeko parada izan da. Gisa horretan, Alkik konposatu lurrunkorren igorpena %80z apalduko da eta zurezko hondakin guziak produktu deribatuen fabrikatzean baliatuko. Isolamendu biziki onari esker, tenperaturen gorabeherak, hezetasun maila eta airearen kalitatea menperatzen dira. Horrek tailerra tenperaturez aldatzen saihestea ahalbidetzen du. Eraikin berria argi naturala ahal bezainbat baliatzeko, eguzkiaren orientazioa eta eraikinaren aitzinaldeko idekidura handiak ahal bezain ongi ustiatuz, argi artifiziala puntualki soilik piztea ahalbidetzeko gisan pentsatua izan da. Eraikinaren teilatuan instalaturiko eguzki panelen urteko energia ekoizpenak tokiko beharrak osoki beteko ditu. Hornidura elektrikoa %100ean berriztagarria da orain, "Enargia" tokiko argindar hornitzailearen bidez.
Showroom-a eta saltegia
Iratzoki estudioak 400mÀ‚'²-ko showroom erakusketa gela diseinatu du, bisitariei murgiltze esperientzia eskaintzen diena. Leku hunek Alkiko altzari bildumak ezagutaraztea gonbidatzen ditu bai partikularrak eta bai profesionalak, izan etxeko sorkuntzak, ostalaritzako sortak edo bulegorako antolamenduekin.
Erakusketa gela guneka antolatua da, orotariko giroak erakusteko gisan: jatetxe, proiekzio gela zein liburutegi, Alkiren sorkuntzen aldakortasun handia nabarmenduz. Showroom-aren ondoan, Alkiren bildumen objektu osagarriak proposatzen dituen saltegia bada. Horietako batzuk bertan eginak dira, besteak tokiko markekin eraman lankidetzan. Bestalde, Euskal Herriko beste ekoizle batzuek sortu objektu batzuk ere badira, arta handiz hautatuak izan direnak, tokiko trebetasun eta aberastasunen erakusleiho direnak.
Erakusketa gela eta saltegia asteartetik larunbatera (9:00-17:00) idekiak dira, partikularrak eta profesionalak bertaratzen ahal dira, altzariak ikusi edota erostera.
