Azalekoa | 2024ko Azaroaren 07a
Herri Ekintza, Euskal Herritik mundura
A.E.
Frantzia mailan CMR (Chrétiens dans le Monde Rural) federakuntza bazela eta, Ipar Euskal Herriak bere antolamendua ukatea gogoetaturik, Herri Ekintza sortu zen. CMR-aren helburua baserrialdean bizikidetza, haurridetasuna eta elkartasuna sustatzea da, noizbehinkako topaketen bidez. Jendartea eraldatzen laguntzea du xedetzat. Herri Ekintzako Mikele Berhocoirigoin lehendakaria eta Léonie Aguergaray idazkariarekin bildu gira gehiago ikasteko.
Proiektuaren abiatzea
Aspalditik JAC-a (Jeunesse Agricole Catholique) izan zen, zeinetan gazteek laborantza inguruan gogoetatzen zuten. Denborarekin, elkarretaratzeko eta gogoetatzeko gogo hori agertu zen. JAC-an ibili zirenek MRJC-n (Mouvement Rural de Jeunesse Chrétienne) parte hartu zuten, CMR-era joan aitzin.
Ipar Euskal Herrian Herri Ekintza sortu zen 1967an, elkarte araudiak Baionako suprefeturan ezarriz.
JAC-an aipatzen den bezala, “ikusi, gogoetatu eta zer egin” lemaren inguruan gogoetak eta ekintzak eramanak dira. Jende horiek ezagutu eta ingurumenaz, elikaduraz, bizitzeko maneraz, gertakizunez,… hitz egin, gogoetatu eta zer egin daitekeen aipatzen da.
Frantzia mailan, CMR federakuntza bat bada, 70 elkarte biltzen dituenak. Herri Ekintza Ipar Euskal Herriko elkarte bakarra da, 3 talde biltzen dituenak Itsasun, Suhuskunen eta Donapaleun.
Herri Ekintzako 3 taldeek ber egin moldea dute: laikoak biltzen dira talde lanaren eraikitzeko, apez baten sustenguarekin.
Herri Ekintza
Orain arte Herri Ekintzako bulego lana Itsasuko taldeak egiten bazuen, lekukoa Suhuskuneri pasatua izan zaio aurten. Bulego berrian Gamarteko Mikele Berhocoirigoin da lehendakaria, Jutsiko Bernadette Oillarburu diruzaina eta Muskildiko Léonie Aguergaray idazkaria.
Mikele Berhocoirigoinek erran digu gaur egungo helburua Herri Ekintza idekitzea dela, kanpañan diren pertsona guzien artean lan eginez. Helburua jendea libro uztea da bere gogoetetan. Herri Ekintzan eramaten diren gogoetak Frantzia mailan bai eta mundu zabalean ere eramanak dira.
Herri Ekintzako bi kideek gaur egungo munduak pairatzen dituen arazoez hitz egin nahi ukan dute. Besteak beste, erran digute Sokorri Katolikoak biziki argiki agerrarazi duela egungo egunean Frantzian 2.000 haurrek karrikan lo egiten dutela, Frantzia munduko zazpigarren herri aberatsenen artean kokatzen delarik. Baserriari ala kanpañari so eginez, 8 biztanletarik bat pobrezian bizi da, zonalde peri-urbanoetan 13 pertsonetarik bat denean. Horrez gain, Mikele Berhocoirigoinek eta Léonie Aguergarayk zonbeit apezek haurreri egin sarraskien gaia ere aipatu nahi ukan dute. Horren parean, elizaren erantzuna antolakuntza dela erran digute. Elizako urratseri buruz, denborarekin bainan laster gauzak aldatu direla zioten, jendartearen bidez, eta zinodoaren segidan. Herri Ekintzak gai horiek denak aipatzen ditu, bere baitan galderak eta gogoetak sorrarazten baititu.
Elkarretaratzeen antolaketa
Herri Ekintzako 3 taldeak bi hilabetero biltzen dira, mahain inguru bat egiten dute, bakoitzak aipatu nahi dituen gorabeherei buruz solastatuz. Ondotik, aktualitatean den lema batez mintzatzen dira. Haurridetasuna eta elkar laguntza dira argibideak.
Beren fedea ekintzetan parte hartuz bizitzen dute, immigranteak, ekologia, klima aldaketa, jende xumeak, elbarrituak, xaharrak, haurrak, lurra, elikadura, jendea bere osotasunean,… jabetasunaren kontra arituz. Gai horiek taldean aipatzen dira, baina bakoitzak bere aldetik parte hartzen du besteak beste sindikatu mailan, sozial mailan, herrian, edota elizako urratsetan, parropian eta herritarren zerbitzurako.
Azken biltzar nagusietan, 3 taldeek landu dituzte gai bereziak. Adibidez 2023an “lurra, osasuna eta elikadura” gaia EHLG-ren filmaren inguruan landu dute. Aurtengo lema “Elizaren gogoeta sozial arloan eta horren aplikapena bakoitzaren eguneroko bizian” izan da.
Denak ongi etorriak
Herri Ekintzako bi kideek erran digute bilkuretara joateko auto partekatzeak antolatzen zirela. Bilkurak biziki idekiak direla eta edonork parte har dezakeela aipatua izan da. Interesatuak Herri Ekintzako kide edo beren parropiako apezarekin harremanetan sartzen ahal dira.
.053457.jpg)
