Nun habila Perkain?

Mikel Erramuzperen “Nun habila Perkain?” dokumentala (52mn) presentatua izanen da gure herrian otsailaren 28an, ostiralez (19:00), Arrume gelan. Egilea bera hor izanen da dokumental horren aurkezteko eta esplikazio guzien emateko. Ondotik hurrupaldia. Berriz ere aipatuko dugu, bainan oraindanik gogoan atxik.

Peio Elhuyar

95 urtetan pausatu da Peio Elhuyar organo-joilea. Ziburutarra zen sortzez, eta ttipi-ttipitik musikari emana. Parise aldean eraman du bizia kontu-egile bezala, bainan musika sekula baztertu gabe. Organo-joile ezagutuenetarik zen eskualde haietan eta kontzertuak ere ematen zituen. 2014an itzuli zen Euskal Herrirat, Paula bere emaztearekin, eta Arrosan finkatu. Orduz geroztik organoa gogotik jotzen zuen eskualde huntako elizetan, hala nola Bidarraikoan. 2019ko abenduan ohoreak ukan zituen gure herriko elizan, bere 90 urteen karietara, Ortzaizeko “Baigura Kanta” koralaren eta Baigorriko koraleko kantari zenbaiten presentzian. Frangotan erraiten zuen zenbat maite zuen hemengo organoan musika jotzea. Bazuen urte pare bat haatik gelditua zela organoa jotzetik, osagarri nekeengatik. Gaizkiturik, azken bi asteak Baionako ospitalean iragan ditu, han AVC bat ere egin bainan ororen buru goxoki pausatu dela erran daukute Paulak eta Pantxika alabak (Baionan bizi den alaba hau eta hunen hiru haurrak ere musikariak dira, eta Peioren bigarren alaba Parise aldean bizi da). Peioren gorputza erraustua izan da Artix aldeko erraustegian (Biarnon). Gure atxikimendu suharrena doala familiari.