Azken Euskal Elkargoaren bilkura orokorrean, euskarari buruzko bi delibero bozkatu dira gehiengo handiz: euskara elkargoaren eremuko lurralde hizkuntza gisa ofizialki aitortzea eta euskararen aldeko hizkuntza politika proiektua abiaraztea. Egon gira Euskal Konfederazioko Sébastien Castet ordezkariarekin, jakiteko zer balorapen egiten zuen hainbat urtetan euskararen arloan ari den elkarteak

Euskararen aitortza ofiziala

2016an, Euskal Konfederazioak eta Euskaltzaindiak plazaratu zuten elgarrekin adierazpen bat, euskararen ezagupen ofizialaren beharra Ipar Euskal Herrian. Euskal Konfederazioarentzat "hartua izan den erabakia begi-onez hartu dugu, lehen aldia delakoz Ipar Euskal Herri mailako instituzio batek bozkatzen duela euskara lurralde huntan ezagutua izan dadin". "Bestalde, delibero horrek Euskal Elkargoak euskararen aldeko hizkuntza politika ausarta eramaiteko duen borondatea berresten eta sendotzen du nolazpait" zion Euskal Konfederazioak.

Hizkuntza politika proiektua

Hizkuntza politika proiektuari buruz, hain zuzen, egokia eta mamitsua iruditzen zaio. Izan ere, gaur-egun euskararen alde emaiten ari diren pausuak euskalgintzak urte luzaz egindako lanari esker dela oroitarazi ondoren, eremuka finkatu helburu eta neurri anbiziotsuetaz gain beste hainbat puntu interesgarri bezain garrantzitsuak agertzen direla dokumentuan. Euskal Konfederazioko kideak azpimarratzen zuen, "hizkuntza politika proiektua ausarta bada ere, frantses legedian mugatua gelditzen dela". Baliabide juridikoak mobilizatuz gaur-egungo blokatzeak gainditzeko nahiarekin Euskal Elkargoak horrelako lan baten abiatzea behar-beharrezkoa du. Txalogarria da esperimentazioaren bidez lege koadroa aldatzeko griña hori ikustea, euskararen garapenean urrunago joateko, koofizialtasuna onartarazteko.

Euskararen Erakunde Publikoaren (EEP) akulatzaile

Hizkuntza politikaren eskumena instituzio maila desberdinen artean partekatua bada ere, Euskal Konfederazioak azpimarratu izan zuen norbaitek oldar politikoa eman behar ziola. Beraz herriak laguntzeaz gain EEPren baitan akulatzaile eta bultzatzaile rola nahi izatea, beste instituzioek -Estatua, Eskualdea, Departamendua- Ipar Euskal Herrian dituzten zerbitzuetan eta azpiegituretan euskararen presentzia eta erabilera hobetu ditzaten, begi onez ikusten du Euskal Konfederazioak.

Euskal Konfederazio laguntzeko prest

Sébastien Castet-entzat: "Bi delibero horien edukia kontuan hartuz, oinarri sendoa dugu Ipar Euskal Herrian jauzi kualitatibo eta kuantitatiboa emaiteko euskararen aldeko hizkuntza politikan". Orain arte egin bezala hizkuntza politika proiektua eraikitzen laguntzerakoan, Euskal Konfederazioa elkarlanerako prest da, bakoitza den lekutik eta duen funtzioa gogoan harturik, lan handi horretan denek baitugu zer ekarri eta zer proposatu. "Orain euskara Ipar Euskal Herriko hizkuntza gisa ofizialki aitortua dela, behar eta merezi duen bezalako hizkuntza politika eskain diezaiogun!"