Otsailaren 11n ospatuko da Emakume eta Neska Zientzialarien Nazioarteko Eguna. Karia horretara, Euskal Herriko bederatzi erakundek Emakumeak Zientzian 2020 izenburua duen jarduera programa prestatu dute. Ekintzak Donostian izanen dira otsailaren 7tik 14ra. Gisa orotako publikoak parte hartzen ahalko du horietan, urririk. Programaren helburua da zientzian ari diren emazteen lana agerian uztea eta nexkato gazteak zientziako ikasketak egitera sustatzea. Jardunaldien egitaraua hau izanen da: Otsailaren 7an, arratsaldeko 4etan, "Zientzia bada nesken kontua" tailerra, 14 eta 18 urte arteko neskei idekia. Arratseko 7etan, berriz, Victoria Eugenia Antzokiko Club Aretoan, "Zientzialariak atzo eta gaur" ekimenaren aldi izanen da. Otsailaren 8an, familiei zuzendu ginkana eginen dute Ibaetako Unibertsitate Campusean. Otsailaren 10ean, "Ingeniari izatera jolasten" tailerrak 12 eta 16 urte arteko nerabeak errezibituko ditu. Otsailaren 13an, "Amona's Power" jarduerak kultura zientifikoaren transmititzaile izan diren emazteak goraipatuko ditu. Azken ekintza, otsailaren 14an, "Berdintasuna zientzian: esperientziak eta etorkizuna" izeneko mahai-ingurua izanen da.