Azken egun horietan, eta bereziki iragan asteburuan, pottokak ukan du zernahi aipaldi! Ezpeletako feriak ziren alabainan eta han izaiten da preseski gaitzeko pottoka-feria. Nahiz besterik ere izaiten den gure eskualdeko feria handienetarik dugun hortan. Lehen baino pottoka gutiago dela hor gaindi eta gure baserrietan aise gutiago baliatzen direla kanpo lanetako, pottokak bere tokia badauka halere eta gauza ona da hori ere. Pottokak gureak ditugu alabainan eta on da artetan bederen oroitaraztea iragan mende hortan nolako indarra akulatu zen pottokaren alde, gisa hortako sustatzaileak agerturik eta bermaturik, hala nola Paul Dutournier zena, Sarako auzapez ginuena. Artetik erraiteko, ez dut behin ere jakin nola pottoka hitz hori lekuka segurik sartua dugun soberaxko edana duen norbaitez ari girelarik. "Pottoka pollita bildua dik", edo "bazian pottoka ederra". Kasu, pottoka pollitarekin moxkorra zira, pottoka ederrarekin aldiz mozkorra. Eta jakin behar da ere moxkorra eta mozkorra azkenean ez dela arras gauza bera! Moxkorrari anitz gauza barkatzen ahal zaizkio. Mozkorrarentzat aiseago erraiten da itsuski dabilan norbait dela, zentzu guti duen norbait! Iragan asteburu hortan berean, pottokak ukan badu aipaldi, arratoin edo garratoinak ere ba ez idurika. Joan den larunbatean Urtats zen alabainan xinatarrentzat eta urte berria, xerriarena bururaturik, garratoinarena izanki. Hamabi urtetarik hola izaiten da. Lehen, eta ez hain aspaldi oraino, gure eskualdetan xinatarren urte berriaz nehork etzuen axola mikorik. Hor ere gauzak kanbiatu dira. Orai Frantzia guzian ere, gehienik hiri handietan, zernahi ospakizun izaiten da. Gaitzeko besta koloretsuak ibilaldi airos batzuekin. Egunkari, irrati eta telebista, eta internet bestalde, karraskan artzen dira erran eta erran, konda eta konda, xinatarren urte berria nun nola iragan den. Xinak bestalde ere badu bat-batean aipaldi frango, horiek ustegabekoak. Han nunbait agertu baita gaitz berri bat, orai arte batere ezagutua etzen birus batek hedatzen duena. Guziz kutsakorra gainerat, ez baita beraz harritzeko halako beldur batek hartzen ari baditu bazter guziak. Gaitzeko sukarra emaiten du eta lanak dituzu hatsa ezin hartuz. Diotenaz gaitz hori abiatua da duela zonbait aste Xina barneko merkatugune handi batetarik. Nola sortu den hori nehork ez jakinki xuxen erraiteko. Dena den, gaitz horrengatik Xinan berean beren urte berriko ospakizun berezi frango ez dira batere egin, gauza harrigarria hori ere! Hobe gaitz hori ez bada sobera hedatzen bainan jadanik badira kasu zonbait Parisen eta Bordelen. Gu, dena den, berriz ere bestak gogoan gabiltza halere. Bixintxoak iraganak, Ihauteriak hor ditugu alabainan. Edo ihaute-bestak, edo ihauteak. Ondoko astetan, nun nahi izanen da zernahi hitzordu alegera. Hartza iratzarturik edo norbaitek pollikiño iratzarrarazirik. Gaixo hartza, zonbait hilabetez lo egona eta orai zernahi itzuli egin behar duena. Ihauteria gogoan beraz bainan gogoan ere, eta nola ez, herriko bozak. Alde batetik, Iduzkilore taldeak eskaintzen duen antzerkia, izen hori daukana, "Herriko bozak" beraz, bainan bestetik martxoko hauteskunde horiek. Hautagai zerrendak hasiak dira agertzen. Batzu eta besteen xede nagusiak ere ba. Denak joan ditela ahal bezen lañoki, jendetasunari emanez zoin-gehiahoka horietan ere hartze duen lehentasun guzia. Agian ez dugu ikusiko gure herrietan Parisen eta hor gaindi jadanik ikusi diren jestu tzar itsusi horietarik, hautagai asko azkarki mehatxatuak, zernahi trufa eta mendekio jasan behar, untsa molde hitsak horiek oro, zinez ezin onetsiak.