Han eta Hemen | 2018ko Azaroaren 29a
Besoak zabalik ihardoki dezagun!
Deia horrela egina zuten Solidarité Migrants-Etorkinekin kolektiboaren inguruan lan egiten duten laguntzaileek. Suprefetura aitzinean emana zuten hitzordua, gero gutun bat emaiten zutela barne ministroari helarazteko. Azken egun hauetan poliziaren presentzia eta presioa gero ta gehiago senditzen direla Euskal Herrian eta horrez gain Akitania Berrian. Jakina dute mila jendarma baino gehiago etorriak direla berrikitan, lurraldea zeharkatzen duten errefuxiatuak argiki gelditzeko helburuarekin. Froga hor da, duela zenbait egun jadanik Hazparnen urte batez biziki untsa integratuak diren bi bolikostar arrastatu baitzituzten, frantziar lurraldetik kanporatzeko obligazioa dutelarik. Bestalde, Landesetan, autobus bat geldiarazi zuten, 19 migrante arrastatuz eta haueri ere kanporatzeko agindua emanez. Autobus hortan haurdun zen emazte bat berriz oinez itzuli da Baionara buruz, 8 orenez oinez ibiliz. Kontrolak biderkatzen direla ere Hendaian salatzen zuten. Kontrol indartze horrek giro kaltegarria zabaltzen duela herrian, segurtasun ezaren sentimendua sortzen duela. Euskal Herri osoan sortu den elkartasunaren zentzu kontra doala, bai eta nazioarteko itunen oinarrizko eskubideen aurka. Jasanezina den politika bat dela, kario pagatzen dutena. Hor zirenentzat argi da errepresio hori debaldekoa dela, pertsona horiek desertua eta itsasoa zeharkatu dute haien bizia arriskuan ezarriz, beren sort herrietan den egoera dorpetik ihes egiteko. Seguritate politika horrek errefuxiatuen egoera oraindik prekarioagoa bilakatzen dela. Hor bilduak ziren 200 bat pertsonentzat dudarik ez da elkartasunaren hautua asumitzen dutela eta estatuak ere bide hori segi dezan galdegiten zuten. Beste migrazio politika bat posible dela eta beharrezkoa litzatekela, Giza Eskubideen Aldarrikapen Unibertsalean agertzen den bezala. Petizio bat abiatua da, milako bat pertsonek jadanik izenpetua dutena, horrez gain mementoan 34 elkarte, alderdi politiko eta sindikatuk bat egin dute.
