San Inazio bestak ospatu berriak ditu uztaileko ondar asteburuan Boiseko euskal komunitateak. Ohi bezala, hiriko hiru leku edo gune izan dira ekitaldien ardatz.

BOISE, IDAHO

San Inazio bestak ospatu berriak ditu uztaileko ondar asteburuan Boiseko euskal komunitateak. Ohi bezala, hiriko hiru leku edo gune izan dira ekitaldien ardatz: "Basque block" delakoa (ekitaldi bestalarienen gertalekua, musika, emanaldiak, dantza, janedana, erakustaldiak...), St John katedrala (erlijio ekitaldiak, euskal meza, San Inazio prozesionea...) eta Udal Parkea (igandeko piknika, haur jolasak, familia giroko igandeko elkarretaratzea...). Euskal eta euskal-amerikar musika ekarle ari izan dira 'Amuma Says No' taldea, 'Txantxangorriak' trikitixa, pandero, alboka eta txalaparta musika eskola eta Biotzetik korala, hiruak Boisekoak; baita Elkoko (Nevada) Mercedes Mendive ere, bere akordeonarekin; eta Euskal Herriko Xabi Aburruzaga eta bere taldea. Besta-giroa ederra izan da; aroa, beroa, sasoi huntan ohi bezala. Bestak bururaturik, Euskal Herrira itzuli da, Boisen urte hastetik egon ondoren, Euskal Herriko Unibertsitateko errektore-ohi Iñaki Goirizelaia. Eusko Jaurlaritzako Diaspora zuzendari berria ere, Gorka Alvarez Aranburu, Boisen izan da.

IOWA HIRIA, IOWA

Iowako Unibertsitateak Kirmen Uribe idazle euskalduna (Ondarroa, 1970) hautatu du bere udako ikastaroetako "International Writing Program" saioetan parte hartzeko, bere pentsamoldea eta literatur lekukotasuna emanik. Agorrilean eta buruilean egonen da idazlea Iowan, euskara eta euskal literatura beste zenbait herrialdeetakoen pare ezarririk. Oroitu behar da Kirmen Uribe proiekzio handiko euskal idazlea dela eta bere lanak 14 hizkuntzatan izan direla argitara emanak munduan zehar. 1967tik egundaino 1400 idazletik goiti hartu dute parte Iowako Unibertsitateko programa huntan, munduko 150 herrialde eta kulturetarik jinak. Gustura ibiliko da Uribe Iowan euskal literaturaren ordezkari. Bere lanak ingelesera itzuliak izan direnez, publiko ingeles hiztunaren iritziak bildu nahi izanen ditu, eta ideia eta ikuspuntuak partekatu.

SAN NICOLAS, ARGENTINA

Buenos Aires probintziako hiri horretan eginen dute aurten Argentinan Euskal Aste Nazionala, azaroko bigarren astean. Bertara gomitatua izan delarik, bi asteko bidaia antolatu du Argentinara Michel Etcheverry kantari heletarrak. Jean-Louis Bergara eta Beñat Chaubadindeguy eremanen ditu lagun musikari. San Nicolasen kantatu aitzineko astean, beste bi emanaldi eskainiko ditu, lehena Buenos Airesko Laurak Bat Euskal Etxean; eta bestea General Las Heras herrian, Zazpirak Bat Euskal Etxea antolatzaile. Ipar Ameriketara hamabost baino bidaia gehiago eginik, hau izanen du Etcheverryk lehenengo aldia Argentinan. "Ezagutu ez nuen arra amatxi bat ere badut Argentinan sortua, Juana Bidart, eta zinez hunkitua naiz bidaia hunekin", adierazi dio HERRIAri.