Euskal Trail

Hor dugu trailer-en hitzordu handia, Salbatoreko asteburu huntan iraganen dena. Euskal Trail elkarteak, maiatzaren 31n eta ekainaren 1ean, 3300 lasterkari errezebituko ditu orai bazterrezina bilakatua den kirol gertakari hunentzat eta joan den urtean bezala, baldintza beretan bost lasterkaldiak, ortziralearekin eta ibiakoitzarekin kurrituko dira. Ultra Trail banaka edo binaka: 130km abiatzea ortziralean (5:00), Baigorritik; Euskal Trail, binaka 2x40km, abiatzea Urepeletik bi egunez, ortziralean eta ibiakoitzean (6.30); Trail Gourmand 2x25km binaka, abiatzea Urepeletik bi egunez ortziralean eta ibiakoitzean lau taldetan, goizeko 7:30, 8:30, 9:30 eta 10:30etan; Neska Trail 8km binaka, ortziralean abiatzea Baigorritik (17:30); Iluna trail 27km binaka, ortziralean abiatzea Baigorritik (21:30). Beste proba bat ere izanen da Ttiki Trail harurentzat, ortzegun huntan kurrituko dena, arratsaldearekin. Badu orai 21 urte Euskal Trail mobilizatzen dela Baigorriko baleari eskaintzeko, famaz Euskal Herriko mugak gaindituak dituen kirol gertakari garrantzitsu hunentzat. Elkarteko kideen inplikazioaz gain lorpen hau, lanaz eta diruz laguntzaile eta partaide guziena ere da, ahantzi gabe lurren jabeak, hauen baimena ere behar baita eremu pribatuetatik pasatzeko. Kirol desafizioaz gain, ongi etorria egiten da kirolarien inguruan, hauen segi etortzen diren guzieri. Gure lurraldearen ezagutarazteko parada eskainia zaiote baita tokiko kalitatezko ekoizkinen dastatzekoa eta erosteko ere. Agian 22. edizio hau traba handirik gabe iraganen da.

Herriko Etxetik

Herriko Etxeak, 60 urtez goitiko herritarrak gomitatzen ditu ekainaren 16an, Plaza Xokon antolatua duen bazkari alaitua gozatzera. Parte hartu nahi duenak, izena eman behar du ekainaren 10a aitzin, deituz Herriko Etxea: 05 59 37 40 80.

Europar hauteskundeak

Hauek izan dira hauteskunde hauen emaitzak gure herrian. Bozka zerrendan: 1341; bozkatu dutenak: 569; bali: 530; xuri: 39. Zerrenden ardiespena, Yannick Jadot: 134; Nathalie Loiseau: 106; Jordan Bardella: 58; François-Xavier Bellamy: 39; Manon Aubry: 37; Raphael Glucksmann: 37. Beste 13 zerrenda, urrunago gelditu dira.