Berri onak ere badira artetan. Joan den astean jakin da lan-eskasak hein bat polliki gibelera egin duela iragan urtean. Bana beste batean %6ez, desberdintasun frango izanki haatik eskualde batetik bestera. Hots, jautsiak gira halere oro har duela hamar urte ginuen hein bertsura. Dena ere on segur! Eta hori hola gertatu da gainerat arrangura frango baden keinka batean. Berri ona bai, ez da dudarik, bainan ez ahantz halere lanik batere gabe direnak badirela oraino ere hiru miliunezgoiti! Eta hau da bestalde gauza harrigarria, hoinbeste langabe ba-eta, etxe frangok langileak falta dituzte eta ez kausitzen! Agertzen diren eskaintzak ez batere asurtiak omen.

Alderdi sozialistaren biltzar nagusia iragan da Marseillan. Arras giro berezi batean. Alde batetik, ez sobera erakutsi nahi alderdia arras ahuldua dela. Hori ez bada ere aise gordetzen ahal! Bestetik lanetan, eta ez guti, elgarren artean ezin akomeatuz! Joan den astekotzat idazten ginuena, arrunt bi pusketan! Hi bahiz eta ni banuk, bi eskualdeak elgarretarik gero eta urrunago, hala erakustera emaiten itxura guziek! Eztabaida pisuena, alderdiak zer toki behar duen hartu eta atxiki Nupes ezkertiar elkargoan. Ahal bezenbat bere gain jarriz, eta hala segituz, ala intsumituen aldean, kasik heien mutil! Kide frango mila dudamudetan, ez jakin naski zoin bide ditakeen egokiena geroari buruz!Solasketa luze eta zail batzuen ondotik, hautsi-mautsi batetara heldu dira halere. Ez sobera galduak agertzeko! Nicolas Mayer-Rossignol Rouen hiriko auzapezak bere ikusmoldea eztiturik eta goxaturik. Gisa hortan onartuz Olivier Faure alderdiburu izaitea, holakorik ez...

Michel Mercier justiziaren ministro egona Nicolas Sarkozy zelarik lehendakari, zigortua izan da baizik-eta bere andrea eta bere alabetarik batto ederki pagatzen zituela denbora batez, batere ez zutelarik lanik egiten! Epaileen arabera, 50.000 euro funts hortan emanik bere andreari eta 37.000 euro alabari. Bildu ere du hiru urteren presondegia bainan aldi huntako barka haatik "sursis" delakoari esker.