Lehen eta oraingo ondarea

Apezpikuen Presondegian hiru erakusketa presentatuak dira.

Euskal diasporaren historia - Irailaren 8an ospatu zen Euskal Diasporaren Europako Egunen kari, Eusko Jaurlaritzak proposatu argazki erakusketa Herriko Etxeak eskuratu du. Bideo bidez lekukotasunak entzungai dira, hauekin batean euskal artzainen argazkiak.

Euskal pilota - Goizeko Izarra pilota elkartearen 100 urteen kari erakusketa muntatua da. Pilotako joko mota desberdinak eta erabiltzen diren ekipamenduak agertuak dira, azalpen-bideo batekin osatua.

Hilerri zaharraren historia - Erakusketak hilerrien izaera ezagutarazi nahi du, Lauburu eta Terre de Navarre elkarteek egin lanaren emaitza da.

Asteartetan salbu egun guziz ibiltzen ahal da, sartzea 5€.

Argazki elkarte berria

Argian argazkigintza elkartea gelditu dela eta, talde batek segida bere gain hartu nahi ukan du.

Hainbat biltzarre egin eta, elkarte baten sortzeko xedea agertu da. Ekainaren 9an, ostirala (19:30), lehen biltzar nagusia iraganen da, Herriko Etxean. Egun horretan, besteak beste bulego berria, elkartearen izena eta norabideak aipatuak eta bozkatuak izanen dira. Interesatua dena hurbil dadila.

Kantaldia

Zitadelako eta Iparralai musika eskolako koruek, ekainaren 9an (21:00), kontzertua elizan eskaintzen dute. Sartzea urririk da.