Untsa gertakari hitsa hau ere! Frantzia iparralde hortan, hamahiru urteko neska batek bere buruaz beste egin du, aski nardatuarekin, adin bertsuko asko lagunek alde bat trufatzen zutelako, itsuski gainerat! Alta, salaketa asko baziren bulta huntan eginak, holako jestu tzarretan hoin ausart zirenak geldi ziten otoi eta otoi. Bainan nehork ez diote kasu handirik egin. Haurraren burasoak ere etsituak, gauzak gero eta makurrago zoatzila. Denen buru haatik, bainan berantegi, funtsezko ikerketa bat manatua izan da, hezkuntza ministroa ere artean sarturik, eta bost lagun, denak gazte hutsak, auziperatuak izan dira. Arrasta kolpe on bat lehen bai lehen emaiten ahal dea holako molde txarreri? Denbora guti barne, gisa bereko bigarren kasua baita hor hola gertatu den hori, eta zinez ezin onetsia izanki bixtan da!

Jaz, Arleseko presondegian, Yvan Colonna, fama handiko korsikar abertzalea, gorputz ariketa batzuen egiten ari zelarik, beste presoner batek itsuski jo zuen, laster hil ere baitzen hartu kolpe tzarren ondorioz. Nola gertatu zen hori, untsalaz alde bat azkarki zaindua zen toki batean, ikerketa berezi bat manatua izan zen. Emaitzak oraintxe agertu dira. Argi eta garbi erakusten dute gauza frango ez zirela batere eginak izan legez-lege eta behar bezala. Presondegiko aitzindari eta kasu egilek huts handiak egin zituztela, kasik ezin sinetsiak nolazpait. Hogoita-zonbait huts naski, legezko txostenak dionaz. Untsalaz, behin hasteko eta bat, Colonna eta haren hiltzailea ez zirela nihundik ere bakarrik gertatu behar gela berean. Ikerketa horren argitara, deia zabaldua da presondegi guzietan neurri bereziak hartuak izan diten holakorik ez gehiago nihun gertatzeko. Kasu egile gehiagorekin, eta kasu egile horiek erneago izanez. Arlesen hutsak egin dituztenak zigortuak izanen...

Olivier Dessopt lanaren ministroa bera ere lanetan da. Auziperatua izanik, baizik-eta bera ez zelarik oraino gobernuan, bainan Anonnay hiriko auzapez, tratu oker bat egin zuela legez lege ez dena untsalaz egiten ahal. Joan den egunean jakin da auzia heldu den azaroan eginen dela Parisen eta oraiko ustez hiru egun iraunen duela. Berak dio haatik deus makurrik ez duela egin eta burua gora joanen dela auzitegira. Askok daukate aldiz untsalaz eta batere xintxoa balitz bere ministro kargua utzi behar lukeela. Ez dela gisa hortaratua den ministro bat holako kargu batean aitzina egoitea, Elisabeth Borne gobernuburua dena lausengu ari zaio haatik, ez deno zigortua bere lana aitzina segitzen ahal duela! Dena den, ondoko hilabetetan, afera horrek ukanen du oraino aipaldi anitz eta anitz.

Ez da errana ministroak den hoberenetik ere beti bere gustura segitzen ahalko duela bere saila. Traba asko eta asko kausituko baitu bere bidean.