Eskubaloia

Asteburu huntan, Irisartarrak eskubaloiko elkarteak, 5 talde bazituen finalean, biga erregional mailan eta hiru departamenduaren kondu. Denak xapeldun atera dira, gaitzeko balentria!

Larunbatean, departamenduaren kondu, Nousty herrian, hamaika urtez petikako mutikoek irabazi dute 17-13 Ossau taldearen kontra.

Asson herrian, Irisarri-Atharratzeko hemezortzi urtez petikako mutikoek 28-23 irabazi dute Buros-Lee Ousse taldearen kontra.

Nesketan, hamahiru urtez petikakoek 23-20 irabazi du Atharratzen kontra.

Igande arratsaldean, Bruges 33 hirian, erregionaleko finalak ziren. Prenazional mailan, Kanbo-Irisarriko neska helduek, 25-24, ttanto batez, Riberac taldearen kontra irabazi dute. Euskaldunak partida guzian gibeletik ziren, azken laurdenean sostengatzaileek lagundurik partida itzuli da. Heldu den sasoinean, nazional 3. mailan ariko dira.

Kanbo-Irisarriko hemezortzi urtez petikako neskek ere 32-26 irabazi dute Rochefort taldearen kontra.

Bestalde, Irisartarrak eskubaloiko elkarteak, ekainaren 23an biltzar nagusia eginen du (19:30). Denak gomituak dira, gauza anitz izanen da aipatzeko.

B L

Pilota

Palantxa - Gure neskek bi lehiaketa jokatu dituzte, gomazko pilotarekin eta trinketean. Frantziako xapelgoaren kondu, Maia Muscarditz-Eztitxu Poutçou-Hourcade artekoak finalerdietan dira. Nazional lehiaketaren kondu 3 pare finalerdietan dira. Xitoetan: Anara Chohobigarat Palmerim-Lili Lahirigoyen Lafitte. Artekoetan: Chloe Indart-Louna Jaureguy eta Emma Orhategaray-Katixa Vignau Tuquet.

Egia da azken urte hauetan sari ederrekin dabiltzala gure neskak.

Esku-huska - Hemen ere Iparraldeko pilota batzordearen eskutik plaza laxoko xapelgoa abiatu zauku. Nahiz eta denentzat multzoko partidak ez diren bukatuak, beste batzuk aste hondar huntan final-hamaseirenak jokatuko dituzte. Hirugarren mailan: Mikael eta Battitt Poutçou-Hourcade anaiek eta Xan Bidart-Julien Arbeletchek. Bigarren mailan: Andde Berrogain-Paolo Bidart.

Udako lehiaketak - Anitzek igurikatzen duten sasoia, Irisarriko plazan bere partidekin. Trinketean palantxazko lehiaketa jadanik abiatua da 92 parerekin, aldiz esku-huska aurten ere 3 maila izanen dira eta heldu den igandeko, ekainaren 11ko izenak eman behar dira Fabrice Mollon deituz: 06-74-58-45-51. Ikusten duzuen bezala, oraino Irisarri aldean pilotaren klaskak entzunen dira.

MO