Iragan ostiralean bururatu da Chino Kalifornian 2017ko NABO Udaleku. Urte guziz Udalekuko hondarreko egun bakotxean bezala, malkoak, azken agurrak...

CHINO, KALIFORNIA

Iragan ostiralean bururatu da Chino Kalifornian 2017ko NABO Udaleku. Urte guziz Udalekuko hondarreko egun bakotxean bezala, malkoak, azken agurrak... Bozkarioa eta tristezia, biak ageri ziren ehun neska-mutiko parte-hartzaileen, heien burasoen eta familiakoen, eta abantxu bi aste hauetan heien etxeetan ukan dituzten familiakoen bisaietan. Kontent, lagun berriak egin dituztelakoz, gauza frango ikasi dutelakoz euskal kulturari buruz, ontsa pasatu dutelakoz... eta tristerik, adio erran eta ezbaitakite noiz elgar ikusiko duten berriz, bakotxa bere biziterri eta estatura itzulirik.

Adio eta milesker erraiteko mementua ere bazen. Chino aldeko familiak arras ongietorri ona eman baitiete haurreri, beren etxeak eta bihotzak idekirik, eta bi astez beren bigarren aita-amak izanik. Chinoko Kluba eta Southern California, 'host' edo 'errezibitzaile' onak izan dira, eta haurrek eta beren familiek ere heien partea egin dute: guzia, haurrak Udalekun kontent ibil zitezen, euskal kultura ikas zezaten AEBetako euskaltasunari segida emateko; AEBetan, bihar, euskaltasunaren suaren eremaile izan daitezen. Euskalduna edo 'Basque' izatea AEBetan (ardura EHan ere) hautuari lotua baita: bakarrik aitzina eginen du haurrak onartzen badu, lagunak egiten baditu, bere haur bihotz amerikanoari (edo globalari) euskal irria ateratzen badio. Hori da aurten ere Udalekuk egin duena Kaliforniako Chinon.