Hungarian (Europa ekialdean, 10 milioi biztanleko estatua) deputatu bozak zituzten joan den igandean.

Hungarian (Europa ekialdean, 10 milioi biztanleko estatua) deputatu bozak zituzten joan den igandean. Parte hartzeak %70a gainditu du, leku batzutan bozkatzen segitu ahal izan dute bozka bulegoak zabalik atxikirik legezko epea baino hiru oren berantago. 2010az geroztik presidente den Viktor Orbanen alderdia (Fidesz) aise aitzinean atera da, bozen %48,9rekin. Bigarren atera da JOBBIK alderdi nazionalista eskuinburukoa, bozen %19,8rekin. Ezker aldean sozialistek bozen %12,4 bildu dute eta ekologistak laugarren lekuan atera dira bozen %6,9rekin.

Hungarian 2011n burutu erreforma instituzionalaren ondorioz kasik erdiaz apaldu da legebiltzarreko deputatuen kopurua. Orain 199 deputatu bozkatuak izan dira. Viktor Orbanen Fidesz alderdiak 133 deputatu dituela deklaratu du, horrenbestez legebiltzarreko gehiengoa bakarrik ukaiteko menturarekin; Jobbik alderdiak 26 aulki eta sozialistek 20 kondatzen dituzte. Emaitza fidagarriak atera bezain laster Jobbik alderdiko buruak kargua uzten zuela jakinarazi du, ber gisan egin du alderdi sozialistaren zuzendaritza osoak.

Viktor Orban, aldiz, arras kontent agertu da, manera berezi batez Poloniako gobernua eskertu du, boz kanpaina denboran publikoki ekarri dion sustenguarentzat. Emaitza horiekin zentro-eskuineko presidentea guziz indartua sentitzen da sinesmen musulmaneko inmigrazioaren kontra segitzeko. Bestalde, Hungariak Polonia, Txekia eta Eslovakiarekin osatzen duen VISEGRAD koalizioa indarturik ateratzen dela bozketa honetatik azpimarratu du Viktor Orbanek.