Euskal diaspora | 2018ko Uztailaren 26a
Euskara Chicagon, Euskal Astea, Gaztemundu eta San Inazio
Joseba Etxarri
CHICAGO, AEB.
Chicagoko Unibertsitatea irakurle edo irakasle baten bila dabil 'Euskarara sarbidea' irakasteko 2019ko urtarriletik aitzina. Gradua ukan beharko luke Humanitateetan, hobesten direlarik Euskal Filologia edo Itzulpengintza Euskaraz, eta esperientzia irakasten, EGA agiria edo parekoa, eta ingelesa menperatu. Interesatuek gutuna behar dute igorri euskaraz eta ingelesez, kurrikulumarekin. Agorrilaren 20an hasiko da hautatzeko prozesua. Informazio gehiago +1 773 702 5671 telefonoan edo jhurtart@uchicago.edu helbidean.
MAR DEL PLATA, ARGENTINA.
Gogoratu nahi dugu azaroko lehenengo astean eginen dela Mar del Platan Semana Vasca 2018, eta harekin batera FEVA Argentinako Euskal Elkarteen Batasunak bere urteko Biltzar Nagusia obratuko duela; baina aurten, ber denboran, Ertamerika, Hego Amerika eta Karibeko Euskal Etxeen Bilkura ere eginen dela, Eusko Jaurlaritza antolatzaile. Gomitatuak dira Argentina, Brasil, Txile, Kolonbia, Kuba, El Salvador, Paraguai, Peru, Puerto Rico, Dominikar Errepublika, Uruguai eta Venezuelako euskal etxeetako ordezkariak. Ipar Euskal Herritik, Euskal Argentina elkartekoak bidaia antolatu dute Euskal Astera joan eta Mar del Plata eta Argentina bisitatzeko (kontaktua, association.euskal.argentina@wanadoo.fr edo 0685 946 112).
GAZTEMUNDU.
Euskal Etxeetako gazteendako den ekimen huntan iragan astelehenean ateraiak dira buruilaren 1etik 16ra Euskal Herrian gaindi ibiliko diren hamabost gazteen izenak, aurten guziak argentinarrak. Hauek dira: Abasolo, Victoria Elena (Arrecifes), Barraza, Iara Belen (Bahía Blanca), Bona, Maria Celeste del Rosario (Chascomus), Crudo Arza, Mailen (Buenos Aires-Laurak Bat), D'amico Matias Eugenio (Cañuelas), Erguy Alcain, Santiago Luis (Parana), Etcheverry, Agustina (General Rodriguez), Gaggiotti, Micaela (Saladillo), Leonetti, Sofia Micaela (Maipu), Marruedo, Lucia (Chascomus), Martinez de Alegria, Jessica (Villa Maria), Montoya, Iñaki Andres (Comodoro Rivadavia), Pastor Pulido, Magdalena (La Plata), Trusso, Micaela Belen (Chivilcoy) eta Urbieta, Sara (Tres Arroyos).
SAN INAZIO.
San Inazio edo Iñaki Deuna izenekin ospatzen dute munduko hainbat euskal etxek Gipuzkoako eta Bizkaiko zaindaria denaren eguna. Diasporan, gehienek helduden asteburu huntan ospatuko dute, eta beste batzuk ondokoetan. Euskal besta handia ukanen dute, konparazio, Idahoko Boisen (AEB), Mexiko hiriburuan, Txileko Valparaiso-Viña del Mar-en eta Santiagon, edo Argentinako Corpus Christi, Necochea, Buenos Aires (Laurak Bat), Roldan, Chascomus, Rosario, Comodoro Rivadavia eta Arrecifes-en, besteak beste.
