Hala du izena urte guziz Eusko Jaurlaritzak munduko euskal etxeetako gazteendako antolatzen duen bi asteko Euskal Herriko egonaldiak.

GAZTEMUNDU

Hala du izena urte guziz Eusko Jaurlaritzak munduko euskal etxeetako gazteendako antolatzen duen bi asteko Euskal Herriko egonaldiak. Aurten euskal instrumentuak jotzen dituzten gazteendako zen eta hala jin dira hamalau gazte Argentina, Uruguai eta Txiletik. Buruilaren 2tik eta heldu den igandera arte euskal musika, aire eta moldeetan trebatuko dira, goi mailako aditu musikariekin. Iragan astean Urkullu lehendakariak errezibitu zituen Gasteizen eta han entzun ahal izan ziren txistua, txirula, trikitixa, panderoa, alboka, ttunttuna, eta baita dastatu ere gazteek berek eskaini zuten dantza emanaldia: euskal dantzak eta ber denboran Argentinako dantza bat ere, Diasporako eta Euskal Herriko erritmo eta izaera bateginik.

UDA BURURATZEN

Heldu den astean bururatuko da. Bitartean, Estatu Batuetan hondarreko euskal piknik eta besten tenorea da. Iragan asteburuan, hiru egin ziren: Nevadako Paradise Valleyn, Santa Rosako Euskal Etxearena, Winnemucca iparraldean; Kalifornian, San Frantzisko iparraldean, Marin-Sonomako Euskal Etxearena; eta Coloradon, Colorado Euskal Etxearen piknik eta besta. Heldu den asteburuan, Renokoek Larrazkeneko Piknika (Fall picnic) eginen dute, eta buruila bukatzeko, Ontarioko (Oregon) Euskal Etxekoek heien "Mikel Deuna" besta. Urrian, 14a izanen da Kaliforniako Rocklineko Iparreko Ibarra Euskal Etxearen piknika eta Susanvillekoen Ardiki Jatea; eta herrialdeko beste puntan, Sagardo Eguna eginen dute New Englandeko Euskal Etxekoek. Kaliforniara itzuliz, urria bururatzeko, BEOk (Basque Educational Organization) bere Euskal Kultura Eguna ospatuko du. Ukanen dugu heldu diren asteetan xantza hauer buruz gehiago mintzatzeko.

KOMITATU BEREZIA

Hala izanen da heldu den asteburu huntan Euskadi, Buenos Airesko FIBEGA Latinamerikako Gastronomia Azokan. Feira hiriburu argentinarrean eginen dute buruilaren 15etik 17ra, eta Eusko Jaurlaritzaren eskutik stand berezi bat eta hainbat euskal hitzaldi, tailer, aurkezpen eta dastaketa eskainiko dira. Hor izanen dira, besteak beste, Andori Luis Aduriz (Mugaritz) eta Edorta Loma (Donostiako A Fuego Negro) chefak, Ines Baigorri enologoa eta Basque Culinary Centereko zuzendari Joxemari Aizega. Oroit bestalde, asteazken huntan bururatu duela Estatu Batuetan bere 2017ko AEB eta Kanadako tour-a Nafarroako Lekunberriko Berri Txarrak musika taldeak, bururatu ere New York eta New Jerseyn, Montrealen, Toronton, Colorado, Washington DC, Rhode Island eta Bostonen ibili ondoren. Heldu den astean gehiago.