Herriz Herri - Aldude (NB) | 2017ko Urriaren 19a
Klikaren 100 urteak
G.S.
Duela hiru hilabete aipatu bezala, Aldudeko klikaren 100 urteen ospakizun hunkigarria izan zen uztailaren 2an.
Duela hiru hilabete aipatu bezala, Aldudeko klikaren 100 urteen ospakizun hunkigarria izan zen uztailaren 2an. Lehenik meza kartsu bat eman zuen Etcheverry apezak, Aldudeko klikak alaiturik "Garde Navarraise" delakoaren laguntzarekin, azken hunek André zuelarik aitzindari. Mezatik landa, 11 musikari ohi, 1940a aitzin sortuak, omenduak izan ziren klikako aitzindari ohi batzurekin batean. Adindunena ginuen Txomin Arrambide (Kalifornian sortua 1922an) eta Urepelerat etorria 10 urtetan, eta gero herriko auzapez egona. Hor ginituen ere Damattit Glaise urepeldarra 45 urtez atabal-joile izana, Pierrot Erramouspe Aldudarra kleron-joile eta klikako aitzindari izana, Damattit Etchepare 30 urtez kleron-joile izana Urepeleko klikan, Léon Arambel atabal-joile Aldudeko klikan, Roger Harriet 45 urtez kleron-joile Alduden, Battitt Laxague esnasuarra kleron-joile Alduden, Jean-Pierre Erreka kleron-joile Alduden, Louis Oteiza Alduden kleron-joile, Jean Itçaina banderaria izana, Ferdinand Bidaurreta esnasuarra banderaria Aldudeko klikan 1970etik hunat eta oraino klikan barne dena. Lau ehun jendek nunbaitan parte hartu zuten gero emana izan zen bazkarian, trinketean. Aldudeko klikak eskertzen ditu egun hortarat juntatu ziren guziak, berezikiago gisa batera edo bestera lan egin zutenak.
