Joan den astean kasualitatez telebistan ikusi dut emankizun bat Frantses estatuko "Goi mailako funtzionarioeri" buruz egina, dokumental hortan agertzen dira prefet batzuk lanposturik ez ukanez, etxen egoiten direla soldata ezin sinetsizkoak hunkituz. Argi izaiteko diru publikoaz dira mintzo, beraz herritarren zergeri esker dira ordainduak. Deskubritu ditut gauza batzuk harrigarriak, behar bada inozenta naiz edo holakoak ez dira jakinak, gutitan aipatzen direlakoz. Emankizun hortan agertzen dira prefet batzuk, nun ahoan bilorik gabe erraiten duten, ez dutela lanposturik eskuratu, baina hala ere estatuarenganik pagatuak direla. Kasu hortan litaizke 442 lanpostu handiko funtzionario! Enpresa pribatuetan, lanik ez duen langile bat aspaldi kanporatua izanen zen. Adibide konkretu batzuk emanak dira, horietarik bat "préfet hors cadre" deitzen diren horietarik da, erraiten du 5.900€ hunkitzen dituela hilabetero, deus ez egiteko. Hauxe bizi ederra! Beste kasu bat, eta hortan geldituko naiz, Jean Glavanyk, ministro egona sozialistak poderean zirelarik, argi eta garbi onartzen du Mitterand orduko presidentearenganik ukan zuela postu hori, ez zuelarik formakuntza berezirik gisa hortako lan batean aritzeko. Erreportaia hortan agertzen da, 5 urtez bakarrik lanean prefet eta ministro karguak ukanik, 9000€ erretreta ukaiten dituela. Emankizun hortan agertzen da pasatu diren presidente guziek jukutria berdina egin dutela beren lagun batzuekin. Bestalde, beti erreportaia hortan, ministerio batzuetako diru xahutzeak ere aipu dira, Macron presidenteak poderea hartuz geroztik Armada eta Atzerriko ministeritzako funtzionario batzuk beren soldata %70ez emendatu dute. Bercyko Ministeritzan Zerga Publikoko buruzagiak hilabetero 21.000€ eskuratuz, urteko 255.000€ egiten duela! Orotara goi zerbitzu publikoetako 600 kuadro badira irabazten dutenak presidentea baino gehiago, jadanik hunek hilabetero 13.000€ hunkitzen ditu! Gero Andere eta Jauntto horiek erranen daukute guk herritar xume bezala, behar dugula kasu egin, kesak hutsak direla... denek indarrak eginez estatuko buxeta hobetuko dela! Holakoak entzuterakoan, bada erotzekoa jakinez pobrezia emendatuz doala, lan egiten duten batzuk ezin dutela berogailua piztu edo beren haurreri behar den bezala jatera eman. Bestalde erretreta erreforma aipu den garai huntan, nun behar ginuken gehiago urtez lanean arizan, hor ere sobera gostatzen direlakoz zahar-arrandak, kuadro horien soldatak deus ez egiteko geldiaraziz, balitzateke hain segur gobernamenduko ekonomiaren orekatzekoa. Abenduaren 5ean mobilizazio azkar bat abiatzer litzateke, ospitaleko artatzaile, tren gidari, eskoletako langile, erretretadun... publiko ala pribatuko langileek deia zabaldua dute. Holakoak entzun eta, ez harritu jende xumea haserretzen bada ez baitugu denek bizi bera!