EUSKARAREN EGUNA. Gure Diasporari loturiko eguna izan da eta segitzen du izaten hein handi batean ENE edo Euskararen Nazioarteko Egunak. Euskal Herrian ezezik, mundu osoko euskal etxe eta komunitateetan ospatzen da, baita Etxepare Euskal Institutuak nazioartean barreiaturik dituen beste hamaika unibertsitate eta irakurlegotan ere. Ohi bezala, abenduaren 3an, San Frantses Xabier egunean, erran nahi baita iragan asteartean, ospatu da, leku frangotan aitzineko eta ondoko asteburu eta egunetan ere programa eta ekitaldiak antolaturik "Bide berriak, modu berriak" lelopean. Heldu zauzkigun gomita eta deialdien artean, Alemanian, Berlingo Euskal Etxekoa aipatzen ahal dugu; Argentinan, Bahia Blanca, Buenos Aires, Cordoba, San Nicolas, Mar del Plata, Necochea, Villa María, San Miguel edota Viedmako Euskal Etxeetakoak... Espainian, Madrilgoa... Frantzian Bordelekoa... Mexikon, Mexiko Hirikoa... Uruguain, Montevideo, Carmelo, San Jose eta Saltoko EEetakoak... hauek batzuk dira, baina zerrenda arrunt luzeagoa da ENE ospatuko duten Euskal Etxe guz¡ena. Unibertsitateei dagokienez ere, hamaika unibertsitate eta herrietan ari dira ospatzen, tartean Txileko Santiago eta Viñan, Estatu Batuetako Boise eta Chicagon, Mexikoko UNAMen, Poloniako Poznanen, Finlandiako Helsinkin, Pariseko Sorbonan, Alemaniako Frankfurt, Berlin, Leipzig eta Konstantzan, Bartzelonako UAB eta Universitat de Barcelonan, Irlandako Cork-en... Leku horietarik bakotxeko publikoak aukera ukanen du euskaldunen hizkuntza eta kulturari buruz entzuteko eta partaide izateko. BORDELE, FRANTZIA. Aipatuko ditugu abenduan zehar Europa eta Ameriketako euskal etxeek Olentzeroren errezibitzeko antolatu Eguberri besta eta elgarretaratzeak. Baina ez dugu ahantzi nahi, Euskal Herritik hurbil Bordaleko Euskal Etxeko lagunek bi ebiakoitzez, abenduaren 7 eta 14an, antolatu duten Eguberri Merkatua, 10:30etarik 18:30etara, Euskal Herriko artisau eta ekoizleen mozkin eta produktuez, eta Kantuz taldekoak animatzaile. "Gustu guzietarako gauzak ukanen ditugu: egurrezko, larruzko, zeramikazko artisauproduktuak, zilarrezko lauburuak, margolanak, jaki eta edariak... "Aukera ederra izanen da opari polit, original eta gure artisau eta ekoizleek eginikoak prezio onean erosteko", segurtatu daukute.