"Abenduko eguna argitu orduko iluna" dio erran zaharrak. Gure herrietako plaza eta karriketan kolore guzietako girgilak goizik piztuak dira, behar bada arrazoin horrengatik? Arrazoinki, ez da segur, argi-indarraren erabilpenean ere indar handia egin behar dugula errepikatua zaukularik! Noiz hartuko ditugu behar diren neurriak gutiago xahutzeko egun guzietako hainbertze eremutan? 1944. urtean sortuen bazkaria Iraganen da abenduaren 7an Larraldean. Izenak emaiteko Michel Barrendeguy deitu behar da ahal bezain laster. Telethon gure herrian Goizeko 10etarik arratsaldeko 5ak artean iraganen da: lepoko trikotatzaileen desafioa, kantu, dantza, oinezko ibilaldi, kiwi, paella, pastiza eta edari bero saltze... hots denen gustukoa aurkitzen ahalko da parte hartu nahiko duenarentzat. AFM TELETHON elkarteak eritasunen borrokan bere ikerketak aitzina segi ditzan. Adin Goxoaren Eguberriko bazkaria Azkaineko erretretatuak gomitatuak dira abenduaren 19an elgarretaratzera Biltokin Nicolasek onduko duen bazkarirat: ttoro, haragi gorri eta lursagar, ardi gasna gerezi erreximenta, fruitu gorridun deserta berezia eta edariak. Kantua ez da menuan agertzen baina segur gogobihotzen elikagai bozkarioduna ez dela faltako! Plaza eta karriketako obrengatik saltegiek udazkenean sofritu baitute, aurten zozketa xumea antolatuko da baina halere sorpresa izanen da. Parte hartzaile bakotxari 25€ko ordainketa galdegina zaio izenak aitzinetik emanez. Bigarren eskuko jostagailu saltzea Doña Maria eskolako burasoen elkarteak haur karrosa hustea eta jadanik baliatuak izan diren jostagailu merkatua antolatzen du, heldu den igandean, abenduaren 8an, Kiroletako ezker paretan. Irabaziak eskolako haurren aktibitateentzat baliatuak izanen dira.