Zorigaitzez, atentatuak badira kasik noiz nahi eta kasik nun nahi.

Zorigaitzez, atentatuak badira kasik noiz nahi eta kasik nun nahi. Joan den egunean, batto izana da izigarria baino izigarriagoa Egiptoren kondu ekarria den Sinai lurraldean. Islamista atrebitu batzu, hogoita-hamar bat lagun, dira itsuski mendekatu beste musulman batzuri, hauk "sufi" delakoetarik izanki, sobera epelak eta ez bide xuxenetik ibilki gisa hortan oldartu zaizkiotenen gusturat! Terrorista futitu horiek otoitz-leku bat setiatu dute zernahi jende bazelarik barnean, lehergailu azkar bat zartarazi han berean eta iheska joan nahi zuten guziak tirokatu! Orotarat, 305 hil eta ehun bat kolpatu. Hauxe da gertakari hitsa beste frangoren gainerat! Bazter guziak harritu dituen gertakaria, bortizkeria ainitz izanikan ere eskuin eta ezker, hein hortakorik ez baita halere usu aditzen!

Gobernua lanetan

Bainan nola hortaratuak dira Sinai lurralde hortan? Sinai hori gaitzeko lur peza da Egipto ekialdean, Israelgo mugaren hegiz-hegi. Eremuz Frantziako hamar bat departamenduren heina bainan arras biztanle guti, orotarat lau ehun mila nunbait han, ez gehiago. Lurraldea Mediterraneo itsasorat heltzen da iparraldetik. Bainan beste bi itsasok ere mugatzen dute, Itsas Gorriak eta Akabako itsasguneak. Mendealeko muga izanki aldiz Suez deitu ur-bide famatua. Hortakotz erraiten ahal da penintsula bat dela, frantsesez "péninsule", eta euskaraz penintsula hitza erabil ditake dudarik gabe, hiztegi batzutan sartua dute segurik... Jende gehienak itsas-hegian bizi dira, bereziki iparraldean, bainan ere arrunt hegoaldean, han baita funtsean hiri handiena, Charm-El-Cheikh, arrunt turismoari emana (73.000 biztanle).

Gaineratiko eremuan, ardurenik abere hazkuntzari emanak diren leinu batzu, alde bat harat eta hunat dabiltzanak, ez lekuaren gainean egoiten. Nola ahaideak badituzten Jordanian eta Palestinan, ez dute axola handirik gobernuek ezarri mugetaz eta horrengatik ere izana da (eta bada beti) istorio frango, ez baita harritzeko jakinaren gainean bazterrak zoin minbera diren hor gaindi. Dena den, Sinai lurralde hori, hamar bat urte Israelen legepean egona, Egiptok berriz beretua du bainan gobernuak lanak ditu eta ez entraalekoak, gero eta gehiago baitira hor kokatuak islamista sasi-gudari batzu. Gobernua lanetan da beraz, azken bizpahiru urte hautan gero eta gehiago, larderia poxi bat ezin erakutsiz, artetan armada lekuka bederen agertzen balin bada ere...

Biblian ere aipatua

Horiek hola, ez dugu ahanzten, ez ahantzi behar ere, Sinai lurralde hori Biblian ere aipatua dela. Bada hor mendi bat frango gora dena, ardura Sinai deitzen dena (2285 metro gora) eta diote Jainkoarenganik Moisek hor zituela eskuratu hamar manamenduak, judu eta giristinoek berena daukaten lege nagusia nolazpait. Funtsean, arabiarrez mendia deitzen da "Djebel Moussa" erran nahi baita Moisen mendia. Handik hurbil, beste mendi bat, lurraldeko gorena, Santa Katalina (2642 metro). Bi mendi horien artean, monastegi bat guziz famatua, giristino ortodoxoek kudeatzen dutena, ondoko mendia bezala Santa Katalina deitzen dena. Hogoi bat fraile han bizi, gehienak greko edo greziarrak. Hirugarren mendekotzat moldatuak lehen eraikinak, geroztik handituak, azkartuak eta edertuak.

Hau ere erran behar da haatik: aspaldian badira ikerleak eta historialariak kezkatuak daudenak, Sinai mendi hortan zituenetz Moisek eskuratu, luzaz erran den bezala, delako hamar manamenduak ala ez ote Arabia alderat urruntxago den beste mendi batean. Bistan da ez dugula guk trenkatuko eztabada hori bainan hauxe erraiten ahal dugu haatik, gisa guziz Sinai lurralde hori guretzat ere guziz aipagarria dela, guziz baliosa, eta hor gaindi gertatzen denak hunkitzen gituela nahitez gu ere, azkarki inarrosten ere joan den eguneko salbaikeriaren kasuan bezala...