Joan den astean Baionako Euskal Museoan, Yves Ugalde presidenteak aurkeztu du zuzendari berria, Sabine Cazenave, kontserbatore dena, azaroan hartuko du funtzio berria. Olivier Ribeton-en segida du hartzen, azken hunek erran dauku 1988ko azaroan sartu zela Euskal Museoko kudeaketa lanetan, eta 31 urteren buruan harro senditzen dela lekukoa emaiteaz Sabine Cazenave bezalako pertsona bati. Ribeton-ek eskertu nahi izan ditu Museoko Lagunak bai eta ere Jean Haritschelhar zena, harek anitz lagundu eta erakatsi ziola azpimarratuz. Sabine Cazenavek bere burua aurkeztu du, bere lehen hitzetan euskal erroak zituela erranez, ama Barkoxekoa izanez haur denbora parte bat Xuberoan pasatu du eta beste parte bat Donibane Lohizunen. Euskaraz hitz bakar batzuk zazkiela, ez batueraz baina xiberotarrez. Euskararen ikasteko nahikaria agertu du, beharrezkoa baitzaio Euskal Herriko museo baten kudeaketarako funtzioa hartzen duen batek tokiko hizkuntza jakitea. Lanbide parte bat erakaskuntzan pasatu du eta beste partea museoetan, azkenik Paris-eko Orsayko Museoan. Euskal Herrirat etortzeko tira ukan zuen etorri zelarik Kanborat Orsay museoak prestatu Clémentine-Hélène Dufauren auto-margo batekin. Bi ardura ukanen ditu, kontserbadore betekizuna eta zuzendaritzarako kudeaketa, osagarriak direla zioen. Baionako Euskal Museoa hein onekoa dela gehitzen zuela bere 25 langileekin. Ibili den beste museo batzutan 80 langile arte izanez, talde izpiritua eskas dela zioen. Lan berri hori hartzerakoan xede batzuk ere baditu, Bonnat eta Euskal Museoen artean loturak azkartzea: "Aturri eta Errobiren artean kokatuak izanez, Euskal Herriaren ezagutarazteko parada izaiten ahal dira". Bestalde, bere iduriko Euskal Herri osoko museoen artean bada zer egin, euskal artea berezia dela zioen. Lan batzuk eraman behar direla gehituz, galdera batzuk pausatzen zituela: Euskal margoa berezia da? Gaur egungo artea euskal jendarte baten historiari lotua da? Bestalde museoak segituko du erakusketa eta konferientzia batzuen antolatzen, ohidura duen bezala.