AEKren kurtsoak abian Herriko Elkartetxean finkatua zen izen emaiteko eguna irailaren 17an, epea pasatua izanik ere Senpereko Gau Eskolak ateak zabalik atxikiko ditu borondate on guziendako. Kurtsoak abian dira buruilaren 30ean eta bururatuko dira ekainaren 19an, astean 5 edo 6 oren klaseen arabera. Edozoin klase idekitzen ahal dago: fitxik ez dakitenentzat, zerbait dakitenentzat, euskara barnatu nahi dutenentzat, dakitenek bainan hobetu nahi dutenentzat. Izen emaiteak deituz 05 59 25 76 09, iparraldea@aek.eus edo www.aek.eus webguneetan bai eta xehetasun gehiagorentzat azkaine@aek.eus gunean. AEKren lana goraipatzekoa da gure hizkuntzaren ikasteko, hobetzeko eta erabiltzeko egunerokoan. Heriotze Bi aste barne, bigarren gazte bat, minbiziak jorik 42 urterekin, Jerome Labayle-Troy joan zauku bere aita Dominiqueren bidea harturik, hau zendu baitzen duela 2 urte pasa. Bere suhiltzaile lanari bere bizitza osoa eskaini du azken 20 urte hauetan, bai eta bere emaztea Emilie eta Louise neska ttipiari. Eliza ttipiegi suertatu da, hainbertze familiako, herritar, lagun eta nola ez suhiltzaile andana fier batek ere parte hartu dutelakoan azken kantu eta otoitzetan, kartsutasun handiarekin. Beren omenaldian, suhiltzaileen arduradun eta jaun erretorak azpimarratu dute hunen bihotz handia, beti prest bertzeen zerbitzurako. Heriotze hunek penetan uzten dituen bere haur eta emaztea, bai eta bere ama Bernadette eta anaia Xavier, ahantzi gabe familia eta ahaide guziak, gure doluzko agurrik bizienak. Jacques Brel zenaren kantuak larunbatean Larreko antzokian irailaren 21ean (21:00), Jacques B.- ek kantatuko ditu Brel zenaren abesti klasikoak eta hain hunkigarriak izan diren: "Ces gens-là", "Les vieux", "Ne me quitte pas", "Quand on a que l'amour", "Fernand" eta beste. Kantari imitatzaile hunek aho zabalik uzten du bere publikoa, hain hurbiletik imitatzen du Brel handia, ahotsa, itxura, jestuek oroitarazten dute kantari ospetsua. Harridura eta emozioak nahi baditugu frogatu, huts ezina den ikusgarria eskainia zauku. Prezio betea 12€, haatik 8€ 14 urtez pekoentzat, antolatzailea herriko Lion's Club elkartea, erreserbak Euskal-Herriko turismo bulegoetan bai eta lekuan bertan kontzertua aitzin. Antzerkia Larrekon asteartean "Fabrice Luchini et Moi" deitua den ikusgarria, aurkeztua da irailaren 24an (19:30) Larreko kulturgunean. Ausarta izan behar da Fabrice Luchiniren kopiatzea. Olivier Sauton heltzen da holako balentriaren egitera eta bere idoloari omenaldi ederra eskaintzera. Prezio betea 16€, prezio apaldua 10€, erreserbak turismo bulegotan edo cultureetpatrimoinesenpere.fr webgunean, elkarte hau delarik antolatzaile Herriko Etxearekin betan. Akerreta plazako errota zabalik asteburuan Ondarearen Egunen kari, Jean Bruno Etcheverry jabeak, usaia duen bezala azken urte hauetan, errotaren ateak zabalik atxikiko ditu eta dohainik, larunbat eta igandean. Aurkitzen ahalko dira artogorri irintzea, talo jastatzea, sagarno eta euskal pastiza, hauen artean erakusketa pollit bat artoa eta Senpereko erroteri buruz. Xehetasunak tel: 06 87 49 44 55 eta www.ardatzaarrouet.asso.fr webgunean.Raid Cap Women lehiaketa Bortzgarren edizioa iraganen da larunbat arratsalde eta igande goizean, neskek baizik ez dute parte hartzen eta bikoteka. Lau froga, mendiko bizikleta, kanoe, trail eta orientatze lasterka, gaua ere "bivouac" moduan pasatuko dute. Abiatzea pilota plazatik, agian denbora ederra lagun, aupa neskak! Ortzadarra elkartearen erakusketa Iraganen da irailaren 17tik 25a arte Larreko kulturgunean, egunero (16:00-19:00). Senpereko artisten margolan eta eskultura obreen ikusteko aukera zinez pollita, ez huts egin.