Mugimendu frango asteburu osoan Ederki iragan dira joan den astean aipatu ekitaldiak, bai ortziraleko kontzertua, Atzarri taldeak antolatutako pala lehiaketa, bai eta Tripotxaren Eguna igandean, nahiz eta euri uhar batek trabatu duen esku huskako pilota partida. Koloreak eta Auzotik, bi emazte koru alde batetik, bestalde Peio Ospital, Mixel Ducau gitarran lagundurik. Horien entzutera hurbildu ziren 200 bat beharriak loriaturik ateratu dira. Zuraideko elizan den akustikoa ezin hobean, Gabi Duhalde eta Caroline Phillips gidariak arras baliosak izanez, kalitatezko kantaldia eskainia izan zauku. Munduan gaindi bidaiatu gira, Bidarraitik abiatuz. OXOBIren Ama poema ederra eskaini dugu lehenik bezperan goizegi pausatu den Maite Hirigoyen adiskideari. Korsikan, Serbian, Ameriketan, hainbat erresumetan gaindi ibili gira, "Sister Akt" filmako kantu umoretsu horietarik ere gozatuz. Bururatzeko Peio Ospital eta Mixel Ducau kantari eta musikari mitikoek xoratu gaituzte, hain xuxen denek elgarrekin Peiok idatzitako BAKE MINA emaitearekin, eta nolaz ez "Eta bai, eta bai, nik Euskarari Bai ta Bai!". Bihotzetik eskertzen ditugu parte hartu duten guziak, Z.M. Z. elkarteak aitzina segituko baitu etorkinen laguntzen. Igandeko Tripotx Eguna ere arrakastatsua izan da erakusketarien aldetik. Pintxo lehiaketan aldiz parte hartzaile eskasa sendi zen. Denbora berean, ateak zabalik ziren Paxkal Massonderen etxean eta bisitariak saldo handian joan-jinka ibili dira. Herritarren gostukoa izan dira ekitaldi guzi horiek oharren arabera, nahiz eta beti bide berrietan ibili behar den!