Mundu zabalean | 2022ko Urriaren 06a
Iranen emazteen egoera dorpetzen
Teheranen, Mahsa Amini segurtasun indarrek arrastatu zuten, lege islamikoaren irizpideen arabera ez zelakoz behar den bezala beztitua. Egoera ez argi batzuen ondorioz, 22 urteko emazte gaztea ospitalean hil da, hiru egun koman egon ondoan. Emazte gaztearen lagunek eta familiak bere heriotza susmagarritzat jo dute, pleinta pausatuz. Teherango poliziak dio agenteen eta biktimaren artean ez dela deus gertatu. Nazioarteko hedabideek Mahsa Aminiren buru-hezurreko eskaner baten irudiak agertu dituzte, hezur haustura, hemorragia eta garuneko edema erakusten dituenak, indarkeria gogorren ondorioz heriotza egiaztatzen dutena.
Gertakari larri horren gaitzesteko, manifestazio anitz iragan dira, poliziak bortizki erantzunez. Bestalde protesta bezala Iraneko emazteek aurpegia estali gabe beren burua filmatu dute, hijab-a errez, ileak mozten zituztela. Sare sozialen bidez, mundu guzian agertu irudiek, Iraneko egoera politikoa zein-nolakoa den jakinean izaiteko baliagarri izan da. Oihartzun handia ukan du, mundu guzian manifestazioak iragan dira.
2021ean Ebrahim Raisi presidentearen kargu hartzeak, Iraneko emazteen zapalkuntza indartu du. Behartuak dira buru-oihala ekartzea, basektomiak eta abortuak debekatuak dira. Politika publikoak ezkontza goiztiarrak eta behartuak bultzatzen ditu.
Gertakari latz hunen ondorioz, herritarrak altxatzen dira, manifestazio kopurutsuak eraginez, emazteen ausartzia frogatuz.
