Ikas, euskal pedagogia zentroak, prentsa gomitatu du, agertu dituen liburuen aurkezteko xedez.

Aines Dufau Ikas-eko zuzendariak, gomitaren helburua azaldu du. Zentroak bereziki eskoletako euskarazko materiala argitaratzen badu, izan matematika, historia eta gainerateko sailak, haur eta gazteentzat behartua zen erdarazko liburuen itzulpena egitera, horietan Flamarion argitaletxearenak eta Ecole des Loisirs-enak. Ikas zentroak jauzi bat aitzina egin du, euskaraz ekoiztu obra andana argitaratu baitu, lehen mailako haurrentzat eta kolegiokoentzat. Liburu horiek eskolatik haratago, familietan erabiltzeko gisakoak dira.

Unai Zubeldia Ikas-eko argitalpen proiektu arduradunak, liburuen argitalpenerako irizpideak zein diren azaldu ditu: hizkuntzarena, euskara maila onekoa, haur eta gazteentzat egokia. Edukia garrantzitsua da, agertzen diren obrak pedagogia sailean izanez, interesa sortu behar dute.

Ikas-ek agertzen dituen liburuak dohainik ikastetxetan banatuak dira, tresna bezala euskararen ikasteko eta sakontzeko baliagarriak dira.

Obra horiek, banan-bana autoreek presentatu dituzte.

Eneko Bidegainen Izar saltzailea, ilustrazioa Anne Baskaranek egina. Kontatzen zuen gisa horretako liburua idaztean, testua eta marrazkia kontakizunean lotu behar direla. Haur literaturan, ikaslearentzat liburuak gogoeta bide izan behar duela azpimarratzen zuen. Izar saltzaileak jabetza pribatuari buruzko gogoeta pizten du, autoreak galdera hauen inguruan idatzi du: "Dena sal edo eros ote liteke?" "Diziplinatua izan behar ote da?" "Zuzentasuna bilatu behar ote da, gehiengoak ikusten ez badu ere?"

Antton Harignordoquy eta Elise Dilet-en Intza eta Tomas liburua, Laure Gomez-ek ilustratua. Haur eta gazteak ingurumen gaiari interesatzeko xedea du. Gogoeta hori istorio horien bidez eramana da: "Herrian, sekula agortzen ez den iturria gelditu da, gizon misteriotsu batzuk gorderik den altxorra xerkatzen ari dira. Emazte bilo hori luze ezezagun bat ere inguru-minguruka dabil..."

Xantal Barneix-Elizagarai-ek Basajauna eta Hartza iratzarri bi liburuak presentatu ditu. Erakasle ohia da, bere nahia haurrek euskaraz irakurtzeko gostua har dezaten. Hizkuntzaz haratago erakasle ohiak zioen irakurriz irudimena hazten dela, bai eta haur baten jakitatea.

Xalbat Itzainak idatzi Muga guzien gainetik, Paxkal Bourgoinek egin marrazkiekin. Xalbat-ek Afrikan egin egonaldi batetik abiatu du idazlana, gaur egun aipatzen den immigrazioa lehen lerroan ezarriz. Bamako hiritik heldu diren pertsona batzuen ibilbidea da kontatua. Obra hunen bidez kolegioko gazteri aktualitatean den gaiari buruz gogoetatzeko parada emana zaie.

Regine Elosegik, Iker Àƒ'œthurralt-en partaidetzarekin idatzi Hartz arrea Pirinioetako hartza liburuak hartzaren gaia tratatzen du. Horren bidez, zientzia, historia eta geografia alorrak dira landuak. Obra huntan hartza bada hautatua izan, autoresak erraiten zuen beste alimale batzuri buruz ere egin daitekeela.

Ikas-ek argitaratu liburuen bidez, haur eta gazteeri euskara berenganatzeko ahala emana zaie, manera jostagarri batean, irakurtzeko gostua emanez. Edozeinek erosten ahal ditu, xehetasunentzat 05-59-93-24-80.