Egun eta bihar | 2023ko Maiatzaren 18a
Aski nardatuarekin!
J-B D
Gertakari hunek ukaiten du zernahi aipaldi, ezin uka egia erran aski harrigarria dela! Loire-Atlantique departamenduan gertatua da, hango itsas-bazterrean kokatzen den Saint-Brévin les Pins herrian. Anitzek izen hori bera ere arrotza dukegu, edo orain arte hala ginuen segurik! Nahiz herria ez den hain ttipia, jendetzaren aldetik Donibane Lohizuneren heinekoa. Eta zerbait arraro izan dea herri horrek hoinbeste aipaldi bat-batean ukaiteko? Gertatu dena da Yannick Morez horko auzapezak bere kargua utzi duela eta deplauki jakinarazi deus gisaz ez duela aitzina segitu nahi!
Bainan zendako kargu uzte hori? Aski nardatuarekin! Mehatxu frango ukanik! Eta mehatxuak baino gehiago, berrikitan norbaitek su eman baitio auzapezaren etxeari, makur asko eginez. Herriak tokiz aldatu nahi etorkinen bilgune gisako eraikin bat, leku gehixago ukan dezan eta toki egokiago batean. Herrian berean jende gehienak alde, batzuen arrangura bakarra eskola bat badela ondo hartan berean. Bainan jende frango arrunt kontra, herriz kanpokoak, anitz frango urrunekoak berdin,etorkinak gaitzetsiz, aski kanpotiar badela jadanik, aski bai eta sobera ere! Bilgunearen kontra, arrunt eskuinburuko jendeak, andana bat noiznahi etortzen dena larderia, holako bilgunea ezin onetsia dela bortizki salatuz, tira-hala oihu eta oihu!!
Bazter guzietan mintzo dira afera peningarri hortaz. Alderdi guziak auzapezaren alde. Salbu nunbaitik ere eskuin-burukoak. Emmanuel Macron lehendakariak ere auzapezaren alderateko bere sustengua agertuz ahoan bilorik gabe. Horiek hola, gobernutiar horiek zendako zauden hain mutu auzapezaren etxeari su emana izan zelarik?
Bestalde ere, hautetsi askok eta askok azpimarratzen dute noiznahi jasan behar dituztela gisa bereko mehatxuak, lotsagarriak kausitzen dituztenak!
