Dantzin' Aiherra gaualdia, ibiakoitzean Besta komiteko gazteek jakinarazten daukute ibiakoitz arratsean Aiherrako Denen Etxean memento goxo baten pasatzera gomitatzen gaituztela DJ BULL handiarekin. Berek dioten bezala "kristoin giroa, freskagarriak, alkohola, musika, dantza eta beste segurtatua izanen dira". Odol emaitea Aiherran, ortzegun eta ortziralean Odolaren eskasean direla eritetxe eta ospitaleak jakina da. Osagarrian den edonork laguntza ekar lezake odola emanez. Odola emaiteko zentroak jakinarazten du, Hazparne aldearentzat, Aiherran Denen etxeko gelan, odola aste honetan emaiten ahalko dela abenduaren 12an ortzegunean (8:00-12:00), eta abenduaren 13an ortziral arratsaldean (15:00-19:00). Odola eman ondoan, bistan da usaian bezala ahamen bat jaten ahalko da tokian berean. Garbitzeko produktuen beharra migratzaileentzat Abendu denbora honetan, Sokorri katolikoaren sustenguarekin, Hazparne aldeko Frantses Dardan parropiak garbitzeko produktuen bilketa antolatzen du, Baionako Pausa lekuan diren migratzaileen alde. Behar diren produktuak: gorputz eta ilen garbitzekoak, hortzetako eskuila edo broza eta pasta, usain onak, xukatzeko oihalak, eta paperezko mokanesak. Jakin behar da gaur egun migratzaileak beti heltzen direla eta kasik 100 direla egunero Baionara heltzen, horietan 15 bat gaztetxoak dira. Bilketa hau abenduaren 15a arte, hots igande arte eginen da. Gure herriari dagokionez, joan den igandean utzi behar ziren emaitzak, baina heldu den igandean, Izturitzeko eliza zolan izanen diren kartoinetan utz ditaizke, meza nagusia aitzin (10:30) edo ondotik.