Heriotze Joan den ortzegunean jendaldeak segitu du Terex Intçaurgarat Manexenea ostatuko amatxi bere azken egoitzara. Leispartzen sortua, lau alaba eta seme bateko familia ederra hazi du Robert bere senar zenarekin. Hotel-jatetxean, arrabots handirik gabe, anitz lan egin du eta emazte baliosa baita bihotz handikoaren oroitzapena uzten dauku. Adinarekin, osagarriz ahuldua, azken urteak Lutxiberri zahar-etxean pasatu ditu eta han pausatu da ere 86 urtetan. Doluan den familia guziari eskaintzen ditugu dolumin zintzoenak. Eguberriko kontzertua Duela zazpi urte sortua da Giovanni Prinellik kudeatzen duen herriko abesbatza mistoa. Geroztik urte guziz Eguberriz, kontzertu ederra eskaintzeko usaia hartua du. Aurtengoa, abenduaren 22an emanen du igandez (16:30), Baigorriko eliza berotuan. Kantaldi hau, bi partetan iraganen da. Lehena, lore sorta baten pare eskainia izanen da entzuleeri. Hortan aurkituko dira koruaren errepertorio zabaletik hartu zerumuga desberdinetako kantuak. Bigarrenean aldiz osoki Eguberriko kantuak entzungai izanen dira, hauetan gehienak musikagile famatuen obretarik hartuak eta Alain Petoteguyk orginaz lagundurik. Horra beraz arratsalde goxo baten pasatzeko eta Eguberriko besta giroan sartzeko parada ederra. Sartze librea izanen da