Mintzaldia Larraldean ostiralean Horra nora eta nola gomitatzen gaituen Lapurdi 1609 elkarteak, abenduaren 13an (19:00), Céline Mounolen mintzaldia: "Euskara noiztik Euskara mendez mende". "Mila aurpegi ditu euskarak lurralde honetan" hala zer zioten euskararen urtaroak antolatuz. Gure aldetik euskara noiztik erabilia den jakin nahian, Céline Mounole ikerlaria gai horren sakontzera gomitatu dugu Larraldera. Lekukotasun batzuri esker frogatua zaigu gure hizkuntza bederen bi mila urteko ondarea dugula: Navarrorum Nafarroako erregeen artxibo nagusien ildotik ibiliko gira euskarazko dokumentu idatziak aztertuz. Lehenbiziko aztarna Lergako hilarrian aurkitua izan den idatzizko hitzik zaharrena Erromatarren garaikoa da, nahiz eta Nafarroan latinez baizik idazten zen orduan. Hitzaldi huntan denboran bidaiatzera gomitatzen zaituztegu, mendez mende, gurekin batera. Euskarari nork eman dion behar zion "tornuia" dugu aipatuko, baita ere euskara estandarraren berri emanen. Supazterrean bururatuko dugu gaualdia baso baten inguruan, zatozte gostuan, bat-bateko itzulpena eginen zaizue! Arkaitza antzerkia Larrekon igandean Abenduaren 15ean (17:00), Izarrak Haizean tropelak, Elhande Abeberryren zuzendaritzapean, animatuko du Larreko antzokia, aurkeztuz "Arkaitza" antzerkia. Hiru pertsonaia bakean lo daude arroka baten gainean prehistoria garaian, mamut bat hurbildu orduko, estralurtarrak espazioontziz lurreratzen dira, delako Zelitak. Egoera horrek sortzen du zibilizazioen kaskakoa eta ere sekulako amodio eta komiko istorioak, gatz eta biper askorekin. Irriak eta gogoetak nabarituak dira gizarte hunen etorkizunari buruz, gainera zenbait eszena euskaraz dira. Deneri idekia, arratsalde goxo baten pasatzeko mentura, erreserbak 12€ helduak eta 5€ haurrak deituz 06 49 88 60 91, eta beti bezala lekuan bertan. Suhiltzaileen besta Aurten iragan da abenduaren 1ean, Ur-Hegia jatetxean Ainhoa herrian, Santa Barbara kari. Goizeko mezan parte hartu ondoan tropelak Ainhoako bidea hartu du, han elkartu gira 90 kide inguru. Gomitan aurkitu ditugu auzo herrietako auzapezak edo ordezkariak baita kanpoko suhiltzaile batzuk. Julien Ubiria zuzendariak aurkeztu du pasa den urteko bilana, 673 ateraldi eginak izan dira. Bertzalde azpimarratu du suhiltzaileen egoera, tentsione anitzez betea dela, jendeeri zerbitzua ekartzea batzuri ez zakote aski, harrera on bat ukaiteko orde askotan mehatxuak jasan behar. Heldu den apirilaren 21ean, duela 27 urte bezala, Senperek errezebituko du departamenduko suhiltzaileen kongresua, 500 kidek inguru parte hartuko dute, laguntzak onartuak izanen dira ekitaldi horri buru egiteko. Bi suhiltzaile saristatuak izan dira (10 urte iraganik) Annick Courtel eta Nicolas Daguerre, handik landa denak gozatu gira oturuntza bikain batekin. Eguberriko Merkatu tradizionala iraganen da Xan Ithurria plazan Larrekoren atarian, Urdanka elkarteak antolaturik, abenduaren 14an (10:00-18:00). Egun guzian, erakusketak, animazio musikala eta jateko manera (arno bero, kuiasalda, talo desberdinak), Bizar-Zuriren ailegatzea (11:00), Patxi eta Liliak animaturik, txokoleta beroa eskainia eta mutxikoak Maiterekin (16:00).