Santa Barbara Joan den igandean ohidura den bezala suhiltzaileek Santa Barbara beren egoitzan ospatu dute. Departamenduko hautetsi Darrasse anderea, Carrère auzapeza bi axuantekin, Barnetche erretora eta Gérard Hiriart kolonela hor ziren ospakizun hortarako. Philippe Duguine kapitainak azaldu ditu urteko gora beherak, horietan gure suhiltzaileek 350 ateraldi egin izan behar dutela, heietarik 200 bat Uztaritzen berean. Kamioi berri bat ere ukanen du zentroak 2020an. Ondotik ongi etorria egina izan da bi azken etorrieri: Aurore Laurent eta Bernard Ribeton gazteeri. Graduz altxatze batzuk izan dira, orotara 14 gradu guzietan. Azkenik medailatu batzuk urtez-urte beti hor direnak: urrezko medaila Dominique Darlas (30 urte), zilarrezkoa Isabelle Biansan (20 urte); brontzezkoak hiru: Betti Sarratia (axuant gradurat altxatua, 15 urte) Romain Mrowka (Sarjentu gradura altxatua, (15 urte) eta Thierry Julien (15 urte). Zintzur bustitze eta Leku Eder jatetxean bazkari batekin (kantua errexki airatzen zela) bukatu da eguna. Goresmenak deneri. Biltzar nagusi EH Bai politikoak alderdi bere biltzar nagusia egin du joan den larunbat goizean Lapurdi gelan, 80 bat entzule bilduak zirela. Txosten moralean agertzen ziren mugimenduaren indarrak bainan ere ahuleziak, bereziki bazkide kopuruaren aldetik. Politika sailean mugimendu diferentea ereman nahi duela agertu da, tokian tokiko dinamika azkartuz bai eta sare sozialetakoa. Halere zonbait sektoretan arduradunak falta dira, bereziki laborantzan, euskaran eta sozial arloan. Aurten izan diren hiru ekitaldi nabarmendu dira: Hazparneko hitzaldia, Donibane Lohizuneko agentzia baten moldearen kondenatzea eta Baionan igandetako lanaren kontrako ekitaldia. Miarritzen G7 gailurra iragaitean beste lurralde batzurekin plataforma bat osatu zen. Huntaz oraino sintesiarik ez da agertu dirudienez desadostasunak izan baitira jokamoldearen inguruan. Iragan diren Europako bozetan zonbaiten iritziz eztabaida eskasa izan zen, garrantzitsua izan zaitekelako Euskal Herriarentzat. Azken diru konduak oso orekatuak agertu dira. Elkarteak diru laguntza publikoak hunkitzen ahal ditu, bainan Parisen denak garbiki erakutsiz. Ondotik alderdiak bere egitasmoak luze eta zabal eztabaidatu ditu, lehenik kidetza emendatzea herrizherri biltzen ibiliz, aztertuz zendako batzuk ez duten segitu, h a u t e t s i e n ekarpena berrikustea, karrikako ekimenetan gaitasun bat ukaitea, diru gehiagorekin ekimen horientzat, besta batzuren antolatzea udako unibertsitateaz kanpo, gogoeta sakonak egitea. Hauteskundeak badira herrietan 2020an eta departamendukoak 2021ean. Arlo guzietan ez da lan eskasik. Geroak emanen denen berri. Eskuz Esku Eskuz Esku elkarteak urte bukaerako bazkaria egin du joan den larunbatean Arruntzako Leku Eder jatetxean kasik 140 bat bazkaltiar biltzen zirela bi gela oso betez. Tenorez bildurik, hautuzko bazkari batekin, giro ona agertu da, kantorea ere hemen errexki zoala. Bazkari bukaeran loteria bat egin da anitz opari desberdinekin. Bereizteko momentuan, Edmond Etcheverry lehendakariak bere poza erakutsi du eta elkarte kideak gomitatu heldu den urtarrilaren 16an Lapurdi gelan iraganen den urteko biltzar nagusira. Eguberriko merkatua Tolosan Uztaritze-Tolosa senidetzak autobus bat antolatzen du abenduaren 21ean larunbatez Tolosara joaiteko Eguberriko merkatuarentzat. Abiatzea eginen da goizeko 9:00etan Lapurdiko aparkalekutik hamarrak inguruko han izaiteko gisan. Gibelerat etortzeko abia ordua 16:30etan. Prezioa 12 euro. Izenak eman Peio Berhocoirigoin-i tel: 06 31 07 75 03 edo emailez: bixoko@orange.fr.