Heriotze

Joan den astean bere azken egoitzara segitua izan da Gaztettoneko Jeanine Barnetche, sortzez Tipy. 93 urte zituen. Batita senarrarekin lau seme-alaba ukan zituzten, Caroline, Panpi, Jean-Marie eta Frantxoa. Senarraren, Panpi semearen eta Caroline alabaren heriotzak maluruski jasan izan behar zituen. Duela urtea nunbaitan Baigorriko xahar-etxera erretiratua zen. Azken agur kartsua egin zaio elizan. Gure aldetik, atxikimenduzko agurrak Maider ahizpari, alaba eta semeen familieri, eta ahaidego guziari.

Baztandarrak

Larunbat huntan, urriaren 5ean, ospatuko da Baztandarrak elkarteak kide, laguntzaile eta sustengatzaile guzieri eskainiko duen besta, eguerditik aitzina, Artetxea gelan, alaitasunean. Izena aitzinetik eman behar zen bainan menturaz oraindik toki batzuk balitezke.

Hitzaldi: lakastak

Urriaren 16an, asteazken arratsez (20:00), hitzaldi berezi bat eskainiko du Christian Perronne medikuak Artetxea gelan. Gaia: lakastek sustatutako eritasunak. Hitzaldi hori osasun munduan bereziki lanean ari direneri proposatua da: mediku, erizain, farmazialari, osteopata, naturopata, marexal, sendabelar saltzaile, dietalari... Aukera paregabea gai hortaz informazio nasaia ukaiteko eta lekukotasunen trukatzeko. Hurrupaldi batekin bururatuko da gaualdia. Ez Pass Liberté kolektiboa antolatzaile. Parte hartze librea.

Kontzertu elizan

Sara Evans harpe-joileak eta Damien Papin kontrabaxu eta buzuki joileak (Keryda bikotea) kontzertua eskainiko dute elizan urriaren 20an, igande arratsaldez (18:00). Landareen inguruko musikaldi berezia, gutitan ikusten dena. Ongi-etorri deneri, parte hartze librea.