Itsasoaren zinemaldia

Hendaian Aste huntan, lau egunez segidan, ortzegunetik iganderat, Hendaiak eskaintzen du zinemaldi berezi bat, Filmar deitzen dena. Filmak ikusgai Zokoburuko aretoan. Batzu arras laburrak, beste zonbait aise luzeagoak, gehienak dokumentalak deitzen diren horietarik. Orotarat 22 eta horietarik 10 lehiaketa berezi baten kondu. Gai desberdin asko bainan denen arteko lotura hauxe izanki, denek ba itasoarekin zerbait ikusteko. Hamar urte holako sail bat akulatzen dela eta itxuren arabera aurtengoa ez da txarrena izanen! Lehen emanaldia ortzegun huntan, aratseko 8-etan, "Chants de la mer" À¯'¬'lmarekin. Xoragarriak diren irudiak dauzkan obra bat arras berezia, zointan kondatua baita nola balea konkordun ainitz Hegoburuko aldetik Madagaskarreko itsasalderat joaiten diren urte guziz, beren gisako kantu edo musika berezi bat entzunaraziz nasaiki... Hau besterik da bainan itsasoari lotua eta ez guti, kasik oren bat irauten duen dokumental harrigarri bat, "Plastikakiak itsasoan", erakusten duena nola itsasoak funditzen ari diren, gure kaltetan eta gure ondokoen kaltetan, zernahi plaztika botatuz urerat! Ikustekoa izanen da ere, beste askoren artean, dokumental bat argitan ezartzen duena ilargiak duen eragin ikaragarria itsas-gorakadak eta itsas-beherekadak aldizkaraziz. Itsas-gaien sailean errotik adituak diren batzu gomitatuak izanak dira zinemaldi hortan epaile izaiterat, besteak beste Peio Lizarazu surÀ¯'¬'‚ari xapelduna eta Olivier Mercoli Biarritz-Océan erakustegiaren zuzendaria.

Beti kantu bera

Donibane Lohizunen, herriko kontseiluak aztertu ditu aurtengo norabide nagusiak eta behako bat eman jazko kondueri. Oro har, ez da naski deus arrarorik. Beti kantu bera haatik, jaz eta aitzineko urtetan ja entzuna, gobernuaren laguntzak xuhurtuak, departamenduarenak eta Akitania lurraldearenak ere ttipituak, zailtasunak ba nahitez... Proiektu garrantzitsuak badirelarik gauzatzekoak eta bereziki portu bazterreko hirigune guziaren arramoldaketa. Nola egin diruketa handiegi bat mailegatu gabe eta zergak emendatu gabe? Gehiengoan ez direnak kitzikari bixtan da eta auzapezak berak ere ezin uka buruhausteak badirela... Kantu bera entzun da beste bilkura batean, badiako behar-orduentzat Donibane Lohizune eta Ziburuk elgarrekin xutik ezarri herri-sindikatarenean. Hor ere bada proiektu pisu bat, Ziburuko komentuaren xaharberritzea eta inguru guziaren arramoldaketa. Bada gutienez lau miliun euroren enplegua. Bainan laguntzak ez izanki igurikatzen zirenen heinekoak. Konparazione, departamenduak emanen zuela miliun bat euro baino gehixago, orai diote lau ehun mila baizik ez direla jinen iturri hortarik...

Udaberriko ibilaldia

Igandean da - martxoak 26 - udaberriko lehen igandea eta beraz Udaberriko Ibiladia, batzu Biriatutik abiatuz eta besteak Donibane Lohizunetik, denak Urruñan elgarretaratzeko eta Hendaiako Gaztelu-Zahar plazaraino segitzeko, Jondoni Jakobe bideetarik. Oinezko ibilaldi alegera, bazter pollit frango ikusiz eta batzuk Sokorriko kaperaraino ere itzuli bat eginez. Hendaian, bestaño bat izanen da, kantu askorekin. Dotzenaño bat kilometro oinez eginik ez baitira denak arrunt akituak izanen, hoiek dantzan ere artzen ahalko dira!

Bertsu-saio bat

Hendaian Ortzegun huntan, martxoak 23, aratseko 7-etan, Korrika kulturalaren kondu, AEK antolatzaile, bertsu saio bat muntatua da Hendaian, Bakarxoko ostatuan. Bertsulariak, Maialen Akizu, Arkaitz Oiartzabal, Maddi Sarasua eta Egoitz Zelaia. Bestalde, igandean, goizeko 11-k eta erdietan, mutxikoak Gaztelu Zahar plazan.