Badu zonbait urte orai CAF edo Familien Laguntza Kutxak "Familien eguna" antolatzera bultzatzen dituela departamenduko haur egiturak, RAP 64 edo Buraso Laguntza Sarearen bidez.

Badu zonbait urte orai CAF edo Familien Laguntza Kutxak "Familien eguna" antolatzera bultzatzen dituela departamenduko haur egiturak, RAP 64 edo Buraso Laguntza Sarearen bidez: familien egun hori, haur ttikiak dituzten familieri zuzendua dena bereziki, jadanik eskaintzen da urtero Xiberoa aldean eta Kostaldean ere bai. Garazi-Baigorri eskualdean ez baitzen behin ere horrelakorik proposatu, Goxama Haurtzain sareak galdegin die inguruetako egitura berezitueri elgarrekin prestatzea delako familien egun hori, tokiko familia guzien gozagarri. Aldude ibarreko Baleako Haziak mikro-haurtzaindegiak, Uharte-Garazi eta Ortzaizeko haurtzaindegiek (Hats Berri elkarteak Lasako haur baratzeak, Iparralai musika eskolak eta CIAS xerbitxu sozialak, partaidetzan, antolatuko dute beraz familien eguna otsailaren 10ean, Baigorriko Bil Etxean, Garazi-Baigorriko familia guzientzat. Goizean iraganen da hori, 9etatik eguerdi eterdiak arte. Tailer ezberdinak atzemanen dira, nagusienak musika izanen dutela oinarri: Lagunarte konpainiaren "Mokofina" ikusgarria bi aldiz emanen da, 9ak eterdiak eta 11k artean; Iparralaiek musika saioak eskainiko ditu, 10ak eterdietan 4 urtez petikako haurrentzat, eta eguerdi laurden gutitan 4 eta 6 urte artekoentzat; haurtzain egiturek eta CIASak matahamia eta eskulan tailerrak animatuko dituzte goiz osoan, euskaraz eta frantsesez. Parada izanen da familian mementu goxoa pasatzeko, haurrekin usaiaz kanpoko aktibitateak eginez. Ekitaldi osoa urririk izanen da. Zatozte nahi duzuen tenorean, musikan gozatzera familien eguna Baigorrin!