Oinak Arin dantza taldeak 60. urteburua ospatuko du 2021ean

Ospakizunarentzat gomita luzatzen dute hainbertze urtez parte hartu duten dantzari, musikari eta laguntzaileeri. Ikaragarriko ikusgarri eta pesta antolatzeko parada dela omen. Oraindanik 30 bat musikarik parte hartzeko izena emana dute. Ez baita oraino berantegi, ez duda: eman zuen izena oinakarin@ gmail.com helbidera idatziz.

Herriko kontseiluaren izendatze

Herriko defentsa solaskidea, Philippe DELGUE kontseilariari kargua emana izan zaio. Herri bakoitzak ordezkari bat ukan behar du gobernuko defentsa ministeritzarekin harremanetan sartzeko zer gerta ere. Laguntza Etxerat elkartearen herriko ordezkaria Annie LAGRENADE izendatua da. Oroitaraz dezagun andere Lagrenade euskara gure hizkuntzaren ordezkaria dela ere gure herrian eta herritik kanpoko harremanetan. Bixintxo elkartearen herriko ordezkaria Sébastien LASSEGUETTE da. Azken bi kontseilari horiek elkarte horien biltzarretan parte hartzen dute Herriko Etxearen izenean.

Herriko posta: idekitze orenak oraino murrizten

Alta Beskoitzeko biztanleen kopurua beti goiti doa! Beraz jakin zazue irailaren 5a arte Posta idekia izanen dela astearte, asteazken eta ortziraletan (8:30-12:30) eta ortzegunetan (9:00-12:30). Larunbatetan eta astelehenetan zerratua izanen da. Gutunen biltzea kanpoko kutxan egin da iduriz egun oroz (13:30).

Sistuli edo mustika tigrea

Herriko Etxeak oroitarazten du gure herrian ere marmutxa gaixto hori osagarri onean dela eta kasu eritasun hedatzailea baita. Nola ezagutzen da? Biziki ttipia da, bizkar marraduna du, ziztak oso mingarriak ditu eta egunaz bakarrik ziztatzen du. Bere hedatzearen murrizteko edo ttipitzeko, denek indar bat egin behar dugu. Nola beraz? Gure etxeetako ur geldiak edo putzu geldiak hustuz edo estaliz. Jakin ezazue sistuli emeak 200 bat arroltze erruten ahal dituela ur ustel xorta baten barnean!!