Herriko bestetako egitaraua

Jondoni Petri Senpereri eman dakon izena ospatua izanen da modu librean, ahantzirik azken urtetako baldintzak. Huna zer programa azaldu duen gazte komiteak: uztailaren 1ean, ostiralez (14:00), Eskolen Lasterketa, (20:00) aperitifa pilota plazan, (21:30) Herriko Zikiroa. Etxeratzea taxiz urririk. Larunbatean, (12:00) Txupinazo eta Besta komiteari herriko gakoen ematea, baita urteko kirolarien sariztatzea, (14:30) Beer Pong lehiaketa, (16:00 eta 17:00) Euskal Herriko txapelketaren esku-huskako partida pilota plazan, artekoen A mailan eta bigarren mailan, (19:00) ostatuen itzulia Matraka txarangarekin, (22:30) kontzertua Rotten XIII taldea, (00:00) dantzaldia Trikizio taldea. Igandean, (10:30) meza, Emak-Hor-eko kantari eta txarangarekin, (12:00) Herriko-Etxeak eskaini zintzur-bustitzea, txarangak animatua, (13:30) senpertarren bazkaria, Ramuntxok prestatu paella,"Bizounours"-ek alaitua, (16:30) tonbola, (18:00) Ahate jokoa, (19:00) kantaldia elizan: Eneko Lamothe eta Kalakan, sartzea 5€, (20:00) ostatuen itzulia TTEK elektro-txarangarekin, (22:30) dantzaldia Tabasco taldea. Astelehenean, kultu filmak eta seriak lemapean, (09:00) abereen lehiaketa (Comice agricole) Utsalea aparkalekuan,(12:00) eskeak herrian, (16:00) komitearen desfilea eta gazteen pilotako finalak, (19:00) mutxikoak, Saltoka taldearekin, (21:00) Kaxkatu. Asteartean Gaztetxearen eguna pilota plazan, (14:00) petanka lehiaketa eliza gibeleko parkean, egun guzian eta gaualdi alaitua: txaranga, kontzertu eta DJ. Holako programa bikain batekin baliteke abusatzeko manera, giro umoretsu batean, xintxo ibili. Besta on herritar guzieri!

Ihiztarien berri

Joan den aste hondarrean, beren etxolan bi hitzordu garrantzitsu zituzten, lehenik egun pasa ball-trap delakoarekin eta biharamunean biltzar nagusia. Aldi huntan, beren bihotz ona erakusteko bazkaltzera gomitatuko dituzte laborariak, uztailaren 10ean, ihiztarien ttattolan. Antolaketa laguntzeko, izen emaitea beharrezkoa da, uztailaren 3a aitzin, deituz 06-98-13-34-68.

Lau herritar atxilotu eta libratu

Joan den asteazkeneko gertakaria laster hedatu da eta arratseko 7ak aldean, Herriko-Etxeko plaza mukurru bete da, sustengua ekarri nahiz, hauetan bereziki senpertarrak. Goizarekin geldituak izan dira, batzu manera bortitzean kriminal handiak balira bezala, leporatuz hauen parte hartzea martxoan agertu ziren tindaketa batzuetan. Garai hartan salatua zen bizitegien eskasa, bainan ere hauek sortzen duten izugarrizko espekulazioa. Euskal Elkargoak ere bere aldetik gai huni erantzun bat plazaratua zuen, haatik epaitegiak erabakia hankaz gora ezarri du. Egoera minberatsu hunen sugarrak berpiztu baizik ez ditu egin poliziaren ekintzak, halere galdeketaren ondotik arratseko 11etan libratuak izan dira.

Hitzarmena Euskal Hedabideak elkartearekin

Senpereko Herriko-Etxeak, tokiko eta euskarazko Hedabideak elkartearekin hitzarmena izenpetu du, ofizialtasun bat emanik, Larreko kulturgunean. Lurralde mailan eramana den hizkuntza politikarekinguziz bat egiten duen hitzarmen horren mamia aurkeztua izan zauku. Azpimarratzekoa da Senpereko herria dela lehenbizikoa partaidetza huntan sartzen dena, atea zabalik utzirik bertze Herriko Etxe anitzeri, holako ekimenak bere gisan oinarritzen baitu euskararen erabilera. Euskal Hedabideak taldearen indarrarekin, bereziki kultur ekitaldien komunikazioa hobeki hedatua izanen baita, kazeta, telebista edo euskal irratien bidez.