Heriotza

Joan den agorrilaren 29an zendu zen Xeromi Falxa, Olhaberrietakoa, bere ehungarren urtea betetzen zuen egunean.

Zendu da ere urriaren 1ean Koxe Mari Juanikotena, Antxiñonekoa, 94 urtetan. Meza ederra ukan du: Sebastian Lizaso etorria zen bertsuak kantatzera (azpian irakurgai) eta bildu guziek "Xalbadorren heriotzean" kantua eman dute.

Dolumin zintzoenak bi familieri.

Azken hatsa ematean

Bizi loturak hautsi ta

Heriotzak erukirik

Iñoiz ez du edukita

Konfiantza sentitzen zen

Zu ondoan ikusi ta

Asko egin du aurrera

Zu balantzari eutsi ta

Sorogañen Artzain ziñen

Familia zin etsi ta

Aita ta buraso gaia

Ziñela erakutsita

Milla esker Jose Mari

Begiak malkoz busti ta

Lagun askoren joana

Ta lagun asko utzi ta

Emazte Seme Alaba

Suhi errañekin batera

Billoa senide lagun

Gero arte satera

Gaurko Agurra ez baita

Asturan hasiera

Naiz eta joana zela

Mundu batetik bestera

Norbaitek maite duena

Ez da iristen hiltzea

Loturak manten ditzagun

Bihotzetan da aukera

Nahiz ta ikusi ta

Sentimendua berbera

Gurekin bizi ziñena

Guregan biziko zera

Ezkontza

Lau ezkontza ukan ditugu herrian azken aste hauetan: Jean-Marc Pelaud eta Florence Feyty ezkondu dira uztailaren 23an; Frantxoa Oteiza eta Maitena Gascue agorrilaren 20an; ondotik Josianne Iturreria eta Vincent Barbaste agorrilaren 27an; eta azkenik Xantreaneko Isabelen semea, Mattin Ribeiro, Bordele ondokoa, eta Emilie Mathieu buruilaren 10ean.

Zorionak esposeri eta lau familieri.

Denbora beroak

Euria ere jin zauku, aspaldi huntan igurikatzen ginuena. Herriko xahar batenganik entzuna dugu 1901ean gertatu omen zela urte bat aurten bezalakoa: artoa maiatzean erein eta bildu omen zuten euririk gabe. Buruxkak baizik ez zituzten bildu, egia erran, hain ziren ttipiak. Urte hartan, elurra egin omen zuen euria aitzin. Nehork ez du haatik entzun aurten bezala tenperaturak 40 graduotarik pasatzen.

Baleako Haziak haurtzaindegia

Ibarreko Baleako Haziak haurtzaindegiak hamar urte egin ditu aurten eta urteburua ospatzeko, besta eguna antolatua zuen elkarteak joan den buruilaren 17an, Bankan eta Alduden. "Trukatruk" eta "Gurashow" ikusgarriak gozatzeko jende frango bildu da, haur anitz bereziki. Philippe Albor eta bere lagunek giro airosa sortu dute, denek egun arrunt goxoa iragan dute.

Olhaberri ostatua kudeatzen duen Vanessa Denis-k herritarrak afaltzera gomitatuak zituen, buruilaren 17an, baitu orain bost urte jina dela hor lan egitera Jérémy bere senarrarekin. Giro alaian iragan da otordua, hainbateraino nun afaltiarrek argia bildu duten.