Izen hau ere gogoan hartu behar dugu, literaturaren sailean Nobel saria eskaini baitzaio. Annie Ernaux deitzen da, sortzez Duchesne, eta 82 urte ditu. Duela zonbait denbora solasa hedatu zen aurten sari hori frantses batek ukaiten ahalko zuela eta orobat frantses emazte batek. Eta hala gertatuere da, salbu denen buru sariztatua izan dena ez da batere keinka batez aipatu zituzten heietarik batto. Mende erdi bat ez arras anitz eta anitz idazten duela eta gaitzeko kar aberatsarekin. Usu aipatuz emazteen aldarrikapen bereziak eta bere egun guzietako harat-hunatak.

Normandian sortua, urte asko Bordeleko alde hortan egona.

Ofiziale frango arrangura dira eta ez guti, lanak dituztela ezin hein batean helduz. Okinak, askok bollander edo labekari ere deitzen dituztenak, izan behar dira gehienik pleini. Gero eta karga gehiago jasan behar dutela. Eta saltzen duten ogia ez sobera kariotu nahi! Han-hemenka aditzen delarik prezioa laster bikoizten ahal litakeela. Hori emendatze handia litake, biziki handia, egun guziz erosi behar den gauza batentzat bestenaz ere. Zer gertatuko ote da ondoko astetan?

Bestalde, ozka on batez kariotu dira ere jateko pastak, irrisa eta iguzki-loretikako olioa. Eta anitzen beldurra hori ez dela orobat hastapen bat baizik, makurrena hain segur ondotik jitekoa dela. Bestalde oraino, arrangura pisua hau ere, lekuka ezantza eskasten hasia da. Petrolioa iraztegi batzuetan langile frango greban jarririk, irabazien emendatzea galdetuz. Ondorioz ez dute aldian honenbeste ezantza baino gehiago saltzen ahal!

Horra berriz jina, urrian baigira alabainan, griparen kontrako xertoaren hartzeko sasoina. Jaz aitzineko urtetan baino jende gutiagok hartu zutena. Deia zabaldua da beraz aurten jendea erneago izan dadien. Zergatik? Iduriz gaitza bortitzagoa litakeela, hala baita segurik Australian eta jadanik polliki agertua den herrialde zonbaitetan. Batzuk erranik ere Australia urrun dela, askoren arrangura hori da, xerto hori zinez beharrezkoaditakeela. Ez dela jazko hura gogoan egon behar bainan aurten irrisku gehiago baditakeela kondutan hartuz.

Horiek hola, nola aspaldian hor dugun izurriteak ere aitzina segitzen duen, lekuka azkartuz ere joan, jakintsun askok diote sobera jendek sobera aise alde bat utzia dutela, funtsezko arrazoinik batere gabe, maska baten ezartzeko usaia eta hori denen kaltetan izan ditakeela. Maska berriz ezarriz aise hobeki litakeela, bai griparen kontra eta bai izurrite deabru horrengatik! Bereziki bistan da anitz jende ibiltzen den tokietan eta toki horiek...