Joan den astean Baionako antzokian "mugaz gaindiko misio operatiboa" (MOT) deitu topaketak iragan dira. Jean-René Etchegaray hiriko auzapeza eta Euskal Elkargoko presidenteak, Iñigo Urkullu Euskal Autonomia Erkidegoko eta Jean-Jacques Lasserre Departamenduko presidenteek eta Akitania Berriko Mathieu Bergé kontseilariak Europari buruz duten iritzia azaldu dute.

"Mugaz gaindiko lankidetza, Europa berriaren eragilea" gaiari buruz, Michel Cammesure, Jean-Pierre Halkin, Alain Lamassoure, Karl-Heinz Lambertz eta Ana Urkizarekin mintzaldia iragan da. Beste mahai-ingurua izan da, nun besteak-beste parte hartu duten: Hendaiako Kotte Ecenarro, Urepeleko Xola Aire, Biarritzeko Maider Arosteguy auzapezek eta Joseba Erremundeguy Mugaz Gaindiko Lankidetzarako Aholkulari-ordezkariak.

Bilaka konpainiaren "Mugetatik at" sorkuntza artistiko berria eskainia izan da. Euskal Herriko hiriburuetako besta tradizionalen inguruan, Herriko Etxe aitzinean erakusketa azaroaren 6a arte ikusgai da.