Heriotze

Leizparze Iribarreneko Josephine Haristoy (Falxa sortua) 96 urtetan zendu da, eritasunak eremanik. Doluminak Marcel, Annie, Georgette eta Panpi seme-alaberi eta familia guziari.

Egoitza Etzaunaldeko bidean zuen Stephen Michael Lloyd Eskoziakoa (Glasgow-n sortua) 68 urtetan zendu da, bulta txar bat ukanik, plaza nagusian zelarik. Sokorritzaileak fite etorri dira bainan berantegi zen, ez dute salbatu ahal ukan. Bazen hamar bat urte Baigorrin bizi zela bere andrearekin.

Sortze

Goresmenak Kattalin Sainte Marie eta Ximun Bergouignan-i. Ongi etorria egin dakote heien lehen haurrari. Mara deitu duten alaba ttipia.

Pazko

Huna hemen Aste Saindu eta Pazkoko elizkizunen tenoreak, Artzain Onaren parropian:

Ortzegun sainduz, zeremoniak Larrazkena erretreta etxean (11:00) eta Bankan (19:00).

Ortzirale sainduz, kofesioak eta Pasionea (19:00) Irulegin.

Ibiakoitz sainduz, Pazkoko beila Urepelen (19:00).

Pazko igandez, mezak Bankan (9:00) eta Baigorrin (10:30).

Ikusgarri

Baigorriko ikastolak antolaturik, Pantzo Hirigarai-ek “Pantzo man show” bakarrizketa proposatuko du Bil Etxea gelan, ibiakoitz huntan (20:30). Huna antolatzaileek emanaldia nola presentatzen duten:

“Pantzo Hirigaraik Euskal Herriaren egoerari lotuak diren gai desberdin frango jorratzen ditu, bere maneran, nahas mahas, Euskaltzaina eta euskaldun berriak, San Ferminak, Euskal Herriaren independentzia ospatzeko bazkari antolaketa, Covid-aren eragina abertzaletasunean, emigrante edo etorkinak Baigorrin… Bainan fantesiazko beste aipamen batzu ere proposatzen dauzkigu, hala nola oren aldaketa, irratilariaren sufrikarioak, lehengo eta oraiko gazteen jokamoldeak amodio konduetan, Miss Euskadi eta beste... Oren bat eta laurden umore on!”