Gaztaina jate

Azaroaren9an iraganen da Otxaldetarrak elkarteak antolatzen duen gaztaina jatea, larunbat arratsez (19:00etatik goiti). Herritar guziak gonbidatuak dira. Usaian bezala kantuekin alegeratuko den mementoa. 5 euroko parte hartzea galdegina da. Atxik gogoan eta etor goxoan.

Memento atsegingarriak

Azken egun horietan hitzordu desberdin batzuk proposatuak izan zaizkigu. Eta ezin ukan atsegin handia hartu dugula.

Ariègetik etorritako Sara Evans harpe-joileak eta Damien Papin kontrabaxu-joileak kontzertu xarmagarria eskaini daukute, inguruan zauzkaten landareen musikari loturik. Alabainan, landareek ere beren musika jotzen dute, kaptatzaile berezi batzuri esker entzun ditakeena. Jendea harriturik egon da eta xarmaturik.

Film gaualdi bat ere ukan dugu, Arrume gelan. Bidarrain berean bost gaztek ondu duten “Errekari mintzo” film laburra preziatu dugu lehenik, 'Bidarrai 2040an' gaiari lotua den fikziozko kondaketa pollita. Gogoeta askoren iturri den Itziar Leemans-en “Ximinoa” filma ere gustatu zaigu, zinegilea bera hor ginuela esplikazioak emateko. Angela Duverger zinegileak, bere aldetik, ontzen ari duen “Tenebroso” filmaren zati bat dauku agertu, oso hunkigarria, 2025ean zinema geletan ikusi behar ginukeena.

Liburutegiak kantinan antolatu duen ipuinaldia ere oso atsegina izan da, haur eta heldu multxoa bildurik. Gutartean ginuen Sylvaine Terpereau, Senperetik etorria. Zer kondalari paregabea! Ttipi eta handi, denak loriatu ditu.