Han eta Hemen | 2018ko Urriaren 11a
HERNANDORENA BERTSU SARIKETA 2018
B.S.
Hernandorena sariketak amaiera ukan du joanden ortziralean Hazparneko Ttattola gaztetxean. Sailkatuak ziren sei gazteak hor ziren hortz haginak xorrotx Iulen Vrignon hazpandarrak kudeatu azken saio horrentzat. Ofizioko eta bakarkako lanen ondotik bi hoberenek (Jon Gurutxaga eta Eli Pagola) jokatu dute buruz burukakoa. Hor ofizio lan bat eta kartzelako gai hau: Gazte izaiteak beti izan du borroka eta errebelaldiekin zer ikusia; gaur zure ikuspegitik zer da gazte izaitea? Arras polliki erabili duten gai bat. Epaimahaiak bukaeran Eli Pagola izendatu du xapeldun. EKE-ko Maite Deliart eta Xumai Muruak sari banaketa eginik, Xabi Hernandorenak jantzi dio xapela Eliri. Sailkapena honela gelditu da: xapeldun Eli Pagola, xapeldun orde Jon Gurutxaga, 3) Aitor Servier, 4) Maialen Akizu, 5) Txaber Altube, 6) Asier Galarza. Gazte horiek denek saioetan segituko dute ondotik, batzuek Bizkaiko xapelketan eta hemengoentzat Xilaba xapelketan aurten taldeka eginen dena. Goresmen eta suerte on deneri.
Xilaba xapelketa
Denborarik galdu gabe Bertsularien Lagunak elkarteak hasten du ortzirale huntan berean Xilaba xapelketa taldeka. Hameka talde badira lehian (orotara 44 bertsularirekin, batzu aski ezagunak, beste batzu hasten ari). Taldeen izenak hauexek dira: Dilindan, Eskukula, Ezkobrutak, Kantiniersak, Kontrabanda, Kosta ala kosta, Mattinsalto, Ostatu batuak, Otsoaren 7 umeak, Sasi bertsolariak eta Tirrit. Asteburu huntan beraz Gamereko ostatuan 20:00etan: Kantiniersak eta Ostatu batuak. Biharamunean Altzumartako herriko gelan (19:00): Eskukula eta Otsoaren 7 umeak. Ondoko astean denen berri.