Euskal diaspora | 2018ko Urriaren 11a

Euskal egoitza berria, euskal dantza titulua eta Kaliforniako azken piknikak

Joseba Etxarri

VALENTZIA, ESPAINIA.

Valentzia aldean badira bi euskal etxe, Laurak Bat eta Euskaltzaleok, eta horietarik zaharrenak --Laurak Bat, 1950ean sortua-- egoitza berria estreinatu du, hiri erdigunean. "Valentziaren bihotzean gaude", aitortu diote HERRIAri, "eta kontent, aitzineko lekua txikia geratu baitzitzaigun". Arrakasta seinale da, berri ona. Euskal Etxeak hainbat ekitaldi eta saio antolatzen ditu urtean zehar, konparazio euskara klaseak, musika eta dantza, hitzaldiak, mus txapelketak, filmak, literatura saioak, Korrika... Egoitza berriak "Valentzian bizi garen euskal komunitateari agerikotasun handia ematen lagunduko du", erran digute. Eta komitatu ere: "Eskuak zabalik ditugu guri bisita egin nahi diguten euskaldun eta euskaldunen lagun guzieri". Mila esker eta Zorionak!

DANTZA TITULUA.

Ez da zuzenean Diasporako gaia, baina Diasporako eta hemengo Euskal Herriko anitz jenderen interesekoa denez, aipatu nahi dugu, lehen aldikoz euskal dantza tradizionalari lotua den titulua sortu duela, "Euskal dantza, tradiziotik sorkuntzara" izenpean, Euskal Herriko Unibertsitateak. Euskal Herri osoko lehen mailako irakasleak ditu eta edukiek euskal dantzen ibilbide teorikoa jasotzen dute, jatorrizko bertsiotik, tradizionaletik, egungo abangoardiako adierazpenetara. Diplomak 30 unibertsitate- kreditu behar ditu eta eskolak euskaraz dira, urritik ekainera Leioako kanpusean, Hezkuntza Fakultatean, Bizkaiko Foru Aldundia laguntzaile. Prezioa, 900 euro hiru modulutan; modulu bakotxak (300 euro) 100 ordu ditu eta bereizian egiten ahal da. Leku kopurua, hogei pertsona. Nahi duenak, badaki.

ROCKLIN eta LOS BANOS.

Kaliforniako bi herri hauetan dira ondoko bi asteburuetan euskal hitzorduak Estatu Batuetan. Helduden ebiakoitzean, Rocklineko ‘Iparreko Ibarra’ euskal etxeak bere 14. Euskaldun Besta eginen du, mus txapelketa, gizon eta emazteen txinga-proba, meza klikarekin, dantzariak, ardiki bazkari-afaria eta musika Jean Flesher-en Amerikanuak taldearekin, Lincoln herrian. Eta Los Banos-en, hitzordua urriaren 20an da, eta aurten NABO Kantari Eguna ere han berean eginen dute, NABOren neguko bilkuraren batera, lehen aldikoz. Kaliforniako euskaldunek edo data horietan Kalifornian direnek badakite bi hitzordu eder izanen direla, bietan musean, kantuz, jan-edan bikainekin eta lagun are ederragoekin.

BOISE ETA RENO.

Gaurkoz, gogoratu besterik ez Boiseko Boise State Unibertsitateak eta Renoko Nevada- Renoko Unibertsitateak zabalik dituztela Euskal Gaietako bi irakasle leku. Biak baldintza aipagarrietan dira, eta aukera ona izaten ahal dira Euskal Herriko hainbat ikertzaile eta irakasleentzat heien kurrikuluma hobetu eta estatubatuar eskarmentua emendatzeko, ikerketarako oso egokiak baitira. Egoera hortan bazira, ez utzi pasatzen aukera, honelakoak ez baitira beti hor.

Email Buffer Facebook Google Twitter Pinterest LinkedIn Digg StumbleUpon Tumblr

3469. zbk

Bera eleketaria denak ez ditu biziki maite eleketariak diren beste jendeak.

Arabiako erran zaharra

Gure Hitza | 2018/10/11

Izitzekoa

Janbattitt Dirassar

Lau lagun ostatu batean egoki, aspaldian usaia hartua duten bezala, mundu zabaleko gertakari asko eta asko aipatuz, batek hau eta besteak hura... Ari ziren beraz Indonesiako ugarte batzu azkarki zafratu dituen lur-ikara hortaz. Telebixtan kondatua izanik zortzi ehun hil segurik bazirela eta beharbada aise gehiago ere... (2000 hilez goiti geroztik jakin denaren arabera). Ikaragarriko makurrak bestalde! “Holako baten aditzeak berak hotz-ikara bat bezala emaiten dauzu, zinez izitzekoa ere bada...” horra berehala entzun den ateraldia. Eta bai, izitzekoa ere bada, ez da dudarik, nahiz ez giren ere alde bat ikaran egoiten ahal nun zer gertatuko den... Duela bi mila urte nunbait han, Seneka idazle famatuak gutun batzu bidali zaizkion Lucilius bere adixkideari. Hauxe ziola besteak beste: ez dela aitzinetik sobera kezkatu behar noiz zer nahigabe jasan beharko den, gero ere ukanen duzula nigarrez artzeko denbora. Denak hein bat untsa doatzino hasten balinbazira dena pleinu, zuhauren kalte...

Irakurri segida


Gurekin harremanetan sar




segurtasun kodea

Herria Euskal Astekaria - Jacques Laffitte, 11 - 64100 BAIONA | tel: 05 59 25 62 85 | Legezko oharrak | Diseinua eta programazioa: iF Diseinuak - 2016