2019ko Xilaba Amenduzeko eiheran, bihi guziak eho zituzten! Huna nola Zabalik elkartearen sarean agertzen den gaualdi horren bilduma. Eihera bihiaren ehotzekoa bada, bertsularitza idei(ar)en karruskatzeko izanen da, ustegabea eta ustegabe ongi jina nahitara ala nahigabe konbokatuz. Holakorik bizi izan dugu urriaren 11 huntan, bertsu afariaren karietara, Amenduzeko eiherako bihitegi arraberrituan. Amikuzeko ESKUKULAko hiru lagun eta 4 KOPLASARA taldeko beste lau, beren buruekin lehiatu ziren behatzaile andana berotuaren aitzinean. Azkenik, baina hori ez da ez interesgarri ez sinesgarriena, Sarakoek bildu zuten lehiaketan aitzina joaiteko txartela. Saioa hastean, tokiko eiherazainak agurtu gintuen bertsutan. Ondotik bi taldeek beren agurrak kantatu zituzten, erdi irri, musikarekin edo gabe, hor puxka bat libroan arizan zaizkigu formatu huntan, bakoitzak bere burua laudatuz eta parekoak apalduz ahal bada. Bi taldeetan, bertsulari konfirmatuak eta bertsulari aprendizak baziren. Baina, erran behar da azken hauetan aitzineko Xilabatik aldaketa sumatu dugula, eta sentsu onera, bertsuak aiseago jiten zirelako, eta ofiziotan egiazko elkarrizketak izan zirelako ere, usu bakar hizketa paraleloak izaiteko arriskua delarik, eta batzutan, ideia batzuen txinpartak hunki gintuela. Langintza guzietan bezala, esperientzia hartzeak bere bidea egiten laguntzen du, urratsez-urrats hobera joanez, bakoitzak bere baitarik egiten duen lana ahantzi gabe, eta bertsu eskolako ariketak dira hortan ere bultzatzaile. Biba guziak beraz, izan Amets, Ramuntxo, Ellande, Pettan, Bittor, Julene ala Laida, gaualdira hurbildu ziren 80 afaltiarrek esku zarta beroekin eskertu zintuzten. Eta, ez gaituzue sinetsiko baina, eiherako nazan lo ziren aingirak, gure txaloeri juntatu ziren ur azalean xapla-xapla eginez beren buztanekin. "Idatz jokoa" tailerra Amaia Hennebutterekin Amikuzeko mediatekan urriaren 30ean "Idatz jokoa" tailerra, Amaia Hennebuttek buraso eta haurreri eskaintzen du, elgarrekin liburuaren inguruan memento goxo, ludiko eta sortzaile baten bizitzeko. Tailerra euskaraz eginen da, baina frantsesdunek parte har dezakete. Deneri idekia da, zahar ala gazte, marrazkilari ala ez... denen artean memento goxo eta ludiko baten pasatzeko. Proiektuan, publikoa lehenik ikusle izanen da, irakurketa musikalak entzunez, gero aktiboa bilakatuko da, joko ludikoak eginez, eta azkenik, sortzaile izanen da. Hau antolatua izanen da urriaren 30ean, asteazkenean (16:00), Amikuzeko mediatekan eta oren bat eta erdi iraunen du. Parte hartzea kitorik da eta izena aitzinetik emaiten ahal da deituz 05.59.65.28.72. Urgentzia medikuntzaren egunak Donapaleun urriaren 25 eta 26an. Aitzineko urtetan bezala, aurten ere urgentzia medikuntzaren egunak Amikuzen eginen dira, urriaren 25 eta 26an. Bi egunez Euskal Herritik eta Frantzia guzitik heldu diren profesionalak bilduko dira Bideak egoitzan, sail hortan diren arazoen eztabaidatzeko. Jende aditu anitz etortzekoak dira hala nola Agnès Ricard-Hibon (Frantziako urgentzia medikuntzaren lehendakaria) eta François Braun (SAMUren lehendakaria). Beren egonaldiaz baliatzeko, lekuko berezitasun batzuen ikusteko parada ukanen dute hala nola pilota partida bat trinketean urriaren 25ean (19:00). Xala eta Manu Etchemendy, Waltary eta Beñat Maitiaren kontra ariko dira. Dantzari ikusgarria Burgaintzi dantza taldeak haur ikusgarri bat antolatzen du asteburu huntan, urriaren 26an eta 27an, Donapaleuko zine gelan: ibiakoitzean (20:30) eta igandean (16:00). Ikusgarria "Ez sinetsi direnik, ez erran ez direnik", Burgaintziren azken sorkuntza da. Euskal mitologiaren inguruan oinarritua da eta belaunaldi desberdinetako haurrak dantzan ariko dira txarangak sortu aire berri batzuekin. Txartelak aitzinetik hartzen ahal dira zinegelan. Orotarik - Urriaren 28an astelehenez eta 29an asteartez, odol emaitea antolatua da Donapaleun, beti leku berdinean Hitz Argi salan, astelehenarekin (8:00-12:00) artean eta asteartarekin (15:00-19:00). Ez du balio barurik jitea. - Yogaz arduratzen den Banbu Bihotza elkarteak, asteburu bat proposatzen du azaroaren 2an eta 3an Donapaleun. D. Lazennec, yogan aditua, antolatuak diren aktibitateen animatzeko: Veki Yoga ibiakoitz goizean, Aïkido ibiakoitz arratsaldean eta Veko Zen igande goizean. Ariketa hauetan trebatu nahi dutenak kontaktuan jartzen ahal dira Marie Savaryrekin deituz 06.01.94.78.11