Biriatun, gaitzeko atsedengune pollita, familia frangok berantetsia zutena, estreinatua izan da Kurleku auzoaldean, gero eta jende gehiago bizi-eta hor gaindi. Lurra herriak erosia etxerik ezin eraiki zitakeen toiki batean. Orai, badira hor muntadura guziak zernahi jokotan artzeko. Obrak gosta dira 138.000 euro, departamenduarenganik ardietsirik diru laguntza ederra (37.800 euro). Jean-Jacques Lasserre departamenduburua bera ere hor zen, Baionako suprefeta ere ba....

Hendaian, herriko kontseilua bildu da eta arras berezia den gai bat aztertua izan da bilkura hortan, artetan herrirat jiten diren zirkoena. Joan den uztailean eztabaida pizkorrak izanik Muller zirkoa jitearekin. Nahi ukan zuen baimenik gabe plantatu herriaren konduko eremu batean eta denen buru jarri zen partikular batek zonbait egunentzat utzi zion lur peza batean. Hemendik goiti ez gehiago holako aferarik izaiteko menturan, orai arte gauzak etzirela orobat aski garbi, xeheki finkatu dira zirkoek Hendaiarat jitearekin onartu behar dituzten baldintzak. Beroan bero, erabaki da ere nihundik ahalaz herriak ez dituela gehiago nahi abere basak badituzten zirkoetarik, ardura abere horiek gaizki tratatuak izaiten direla eta gainerat ikusgarri ederrak eskaintzen ahal direla abere horietarik batere gabe. Oroitarazia izan da Frantzian gaindi ehun bat herrik bide bera hartua dutela....

Donibane Lohizuneko merkatu plazan bada noiz nahi mugimendu frango bainan joan den larunbatean bazen usaian baino gehiago, han ospatu baita Eusko-Eguna, kartsuki oroitaraziz eusko hori dela gure Euskal-Herriko moneta berezia, gero eta jende gehiagok baliatzen dutena. Han berean bazen denbora berean merkatu berezi bat, gauza on frango salgai. Hainbestenarekin, euskoaren saila akulatzen dutenek, kudeatzaile Dante Edme-Sanjurjo, banatu dituzte beren sariak, orotarat 29.066 eusko, 50 elkarte zirela hartzale, hala nola besteak beste Euskal-Herriko Laborantza Ganbara, Bizi, Hegalaldia, Integrazio Batzordea eta zonbait ikastola. Lekuko han ziren gomitatu asko, lehen lerroan Jean-François Irigoyen Donibaneko auzapeza eta Henri Anido Ziburuko axudanta....

Ziburun, erne dabiltza herriko bozeri buruz. Joan den astean kondatzen ginuen Ziburu Bizi abertzale taldeak aurkeztu zuela bere zerrendaburua, azken aldiko hura bera, Eneko Aldana. Horra nun beste zerrenda baten berri jakin den. Zerrenda hortan Jojo Aramburu da lehen tokian. 62 urte ditu, errotik ziburutarra, Herriko Etxean sortua, bestalde jadanik biziki ezagutua, aspaldian herriko besta-komitearen buru ere baita. "Ziburu maite dut, j'aime Ciboure" hori da lema gisa hartua duena. Berekin ukanen du besteak beste Jean-Jacques Gouaillardet axudanta, orai arte auzapezaren gehiengoan zena....

Bilkura bat arras berezia izan da joan den astean Donibane Lohizunen, portuko erretegian. Solasgai, eskuin eta ezker entzuten diren arrangurak, norbait bere bizilagunak edo bizilagun ohiak azkarki mehatxatua izanik eta joa ere berdin. Hortakoa den zerbitzu batek muntatua zuen bilkura hori, gure Kostaldean ere gutien ustean badirela holako kasuak. Sozial maileko elkarte zonbait partzuer, poliza ere ba. Ez idurika Donibaneko polizategian berean bana beste batean aste guziz bada norbait gisa hortako arrangura batzuekin agertzen dena. Kasik beti emazte bat da pleini, noiztenka gizon bat. Lehen ere baziren holakoak bainan aise gutiago. Bestalde, holako zerbait gertatzen- eta, istorioa gordetzen zen, gaizki tratatua zena bera ere lotsa kaxketadunen ganat joaiteko edo beste norbaiti kondatzeko zer zitzaion gertatzen. Orai mehatxupean direnak aiseago mintzatzen dira nahiz ikerle frangoren ustez oraino ere kasu guziak ez diren aparantziarik ere agertzen. Bilkuran errana...

Donibane Lohizunen, xahar-etxe berri bat eraikiko da Udazkena zen tokian. Lehen harria joan den astean pausatua izan da. Obrek iraunen dute bi urte baino gehixago. 2021ean bururatuak behar litazke Eguberri aitzinttoan edo hola. Gostako dira 15 milioi euro. Orotarat, bi eraikinetan, 136 lagunen tokia izanen da. Lehenean 82 ganbara eta bigarrenean 54 arta luze eta jarraikiak behar dituzten xaharrentzat, orai arte Trikaldi delakoan hartzen direnak. Trikaldi zerratuko da hemendik bi urteren buruan eta eremua baliatuko bizitegi berri andana handi baten muntatzeko, 174 naski, denak sozial mailekoak....

Ziburun, herriko kontseilua bildu da eta solasgaietan deus ez baitzen eztabaidabide zenik, erabaki guziak aho batez hartuak izan dira. Giroa ondarrerat da samindu. Lehenik, Eneko Aldana hautetsi abertzaleak nahi ukan baitu mintzatu eta bere ikusmoldea eman ondareari buruz berrikitan akulatu ikerketaz. Ihardetsia izan zaio ikerketa bururatua izanez berantegi zela gai horren aipatzeko. Gero, bazterrak oraino minberago Dominique Duguet hautetsiak erraitearekin nolako arrangurak badiren Bi Kaleak izeneko etxegune proiektuarekin. Beldurra lur-lehertze bat izan ditakeela, ondorio txarrak ere ba. Ondo hartan bizi direnak azkarki arrangura eta baziren bilkurarat espresuki etorriak xuxenean entzun nahi zer erranen zen. Hirigintzaz arduratzen den axudantak azpimarratu du Herriko Etxeak kondutan hartuak dituela batzuk eta besteen arrangurak bai eta espertak ekarraraziak. Espert horiek errana omen ez dela lanjerik obrak gisa hartarat akulatzekotan. Delako auzoaldean...