Argazki Lehiaketa Arranoa elkarteak, 9. aldikotz Herriko Etxearen laguntzarekin antolatzen du orain ohikoa bilakatua den lehiaketa, argazkilari guzieri idekia. Aurtengo lema "Arbola" bere itxura guzietan, naturaren erdirat murgiltzen gaitu eta dudarik gabe artista frangok erantzunik hoberena eman lezakete. Lehiaketa hunek araudiak baditu eta lehenbizikoa izen emaite eta argazkien igortzea abenduaren 31 aitzin. Xehetasun guziak aurkitzeko deitu Denis Carlier: 06 88 18 16 36 edo www.arranoa.canalblog. com. Arranoa elkartea da lehenik argazki tailer bat, nun erakutsiak diren tekniko bereziak argazkien hartzeko baita hauen irakurtzeko eta ongi ikertzeko. Bertzalde antolatuak dira argazki-ateraldiak bai eta ere nola erakusketak eta lehiaketak prestatu. Kalakan kontzertua Larrekon Hirukote ezagun hunek eskainiko du kontzertua Larrekon Omiasaindu arratsean, beraz azaroaren 1ean ostiralean (20:30). Xehetasun gehiago zabalduko ditugu heldu den astean, haatik erreserbak lehenbailehen egin behar litaizke, Euskal Herriko Turismo Bulegoetan edo Weezevent webgunean. Prezio betea 16€, tarifa apaldua aldiz 10€ (langabeak, 20 urtez pekoak, 26 urtez peko ikasleak, laguntza sozial hartzaileak). Mugak eta Pirinioak erakusketak Bata Larrekon eta bestea Larraldean beti martxan dira, publikoa baizik ez dute goaitatzen. Huts ttipi bat egina nuen Mugak erakusketaren egitarauan, delako mintzaldi/ hurbilpena "Mineralogia" iraganen da urriaren 26an larunbatarekin (19:00). Hemen parte hartuko dute mineralogiaren ikerketan adituek, balitake gure jakin-minaren iratzartzeko parada pollita, hunen aitzin bisita komentatua da. Larraldean aldiz Pirinioak erakusketa bururatzen da igandean, arratsaldetan idekia (16:00-20:00), balia azken egunak. Heriotze Senpertar seme ongi ezagun bat joan zauku 85 urterekin, Bidegurutzeko Ttotte Astigarraga, eliza untsa bete batean eman zaio azken agurra. Ttottek bere bidean gurutzea karreatu du bere gisa, Jeanine bere emaztea eta Alain semea hain goizik galdu dituelarik. Igeltsero eta ostaler, lan asko eraman ditu, bai eta klikan arizana eta nola ez boxeoan maila on batean. Ororen buru, bere nahigabe guziak beti gainditurik, gizon konpainiako eta arrailant baten itxura utziko dauku. Penetan uzten dituen familia eta laguneri, dolumin bizienak.