92 urte zituen Iriarturruteiko Xane Barbier-ek. Nahiz eta Hazparnen orain alaba baten etxean bizi zen, beti Xane Iriarturruteikoa deitzen genuen, Damatit bere senar zenarekin etxalde hortan lan egin baitzuten biek, azken hau erretiratu arte. 5 alaba eta seme bat ukanik, emazte langile eta isilaren oroitzapena uzten dauku. Azken denbora hauetan aski akitua zen. Kanboko eritegi batean egonaldi bat eginik, berriz etxera sartua zen. Hor haurrez ongi inguraturik zendu da. Jende anitzek parte hartu dute asteazkenean Xane zenaren ehorzketetan, Aiherrako elizan. Gure dolumin bizienak Agnes, Emilie, Marie-Jo, Maite, Yvette eta J-Pascal alaberi eta semeari, familia guziari, anai eta ahizperi eta ahaidegoari. Etxeetako helbide berri eta ofizialak hemendik goiti Badu 3 urte segurrik herritar multxo batek herriko toponimiari buruz lan egiten duela herriko kontseilari batzuekin, herriko bide eta bidexken izendatzeko, etxeen izenak zerrendatzeko, horietan izenik gabe zirenentzat izen bat proposatzeko, Euskaltzaindiarekin baieztatu ondoan. Bestalde, etxeen eta auzoaldeen ongi identifikatzea beharrezkoa baita, batez ere Aiherra bezalako herri zabal eta hedatu batean zerbitzu mota desberdin hauen ongi ibiltzeko (sokorri zerbitzuak, etxeetara banaketak, etxeko zerbitzuak, kartografia, sare operadoreak, GPS eta beste...), eta hemendik laster oso abiadura handiko internet sarea garatuko baita herriko etxe guziei zenbaki bat eman zaie. Herritar guzieri Herriko Etxeak gutun baten bidez jakinarazi die bakoitzaren etxeko helbide ofiziala zoin izanen den hemendik goiti. Herriko Etxeak aldatze hauen berri eman die ere Postako zerbitzuei, suhiltzaileen zerbitzuari, GPS eragileei, Fibre64 erakundeari, zerga eta uraren zerbitzuei, kadastra eta telefono zerbitzuei. Bakoitzari gelditzen zaio orain bankua ala beste abisatzea helbide aldaketa honetaz. Izen emaitea "Arberoan alaiki" aisialdi zentroan Eskola oporren garaian baigira, aisialdi zentroaren zerbitzuak baliatzeko, tokiak erreserbatu behar dira haurrentzat, eta dosierrak Izturitzeko Herriko Etxean utzi urriaren 30a aitzin. Hauek jin arau kronologikoki kontutan hartuko dituzte. Jakina da Aiherra, Izturitze, Donamartiri eta Donoztiriko haurrek dutela lehentasuna ukanen. Xehetasun gehiagorentzat, ondoko helbidean harremanetan sartu behar da: arberoanalaiki@gmail.com. Orotarik - Omiasainduz, elizkizunak: ostegun arratsean Izturitzeko elizan (19:00), eta ostiralarekin, meza nagusia Aiherran (10:30). - Auzoaldeak bestan: herriko bestak ekainean iraganik, auzoalde bakoitzak elgarretaratze edo bestak antolatu zituzten udan, Hergaitzen, Apairin eta Erketan. Larunbatean bilduko dira Zokoa auzoaldekoak, urriaren 26an Denen Etxean, eta Aiherra Gainez Gainekoak, azaroaren 9an toki berean. Biba zuek!