BAIONA, LAPURDI. Joan den astean iragarri bezala, Euskal Komunitateen arteko Munduko 42. Mus Txapelketa egin da Baionan eta Kanadako Franck Altuna eta Rufino Iribarren atera dira txapeldun; bigarren, Nafarroako II. taldea, Javier Apesteguia eta Daniel Zunzarren; eta hirugarren, Euskadiko bikote Borja Ruiz eta Ixone Ureña. Txapelketaren antolaketa igurikatu bezain ederki joan da, baina txapelketak berak izan du afera, Nazioarteko Federazioaren aburuz Frantziaren izenean ari zen bikote baigorriarrak legezkoa ez zen zerbait egin baitu, eta delegatuek bildurik, taldea kanporatzea deliberatu baitute. Frantziako Federazioak bere zinezko desadostasuna agertu du honen aitzinean eta bere sostengu osoa eman die Xabi Alcasena eta Aitor Atchoarenari, eta protesta gisa bere bi taldeak konpetiziotik erretiratu ditu. BUENOS AIRES, ARGENTINA. 'Amelia Artetxe' deitu Katedra berria zabalduko dute heldu den astean Buenos Airesen, Etxepare Euskal Institutuak, Argentinako CONICET (Ikerketa Zientifiko eta Teknikoen Kontseilu Nazionala) erakundearekin batera. Zeremonia, urriaren 31n eginen da hiriburuko San Martin Kultur Gunean, baina lehenago, urriaren 21etik 31ra mintegi bat obratzen ari dira Buenos Airesko Unibertsitatean (UBA), Santiago de Pablo irakasleak emanik. Bestela ere, estreinaldiarekin eginen diren kultur ekitaldien artean, 30ean dantza tailer bat emanen da Laurak Bat Euskal Etxean, Gari Otamendi eta Telmo Esnalen eskutik, eta biharamunean heien Dantza filma eskainiko da San Martin Kultur Gunean. Amelia Artetxe (Bilbo, 1894-Buenos Aires, 1986) argentinar hiriburuko Emakume Abertzale Batza elkartearen sortzailea izan zen eta euskal-argentinar emazteak ahalduntzen lan egin zuen pertsona. BURLINGAME, KALIFORNIA. Eta gaurkoa ezkontza baten berri emanez bururatuko dugu, bi gazte euskal kaliforniar esposatu baitira joan den asteburuan Burlingamen, Fred eta Danielle, euskal lagunez inguraturik, eta gure molde xaharreko ezteiak eginez ospatu dute San Frantziskoaldeko bi familiak bildurik. Fred Alfaro eta Danielle Espinal Kalifornian sortu bi gazte dira, San Frantziskoko Gure Euskal Etxean haziak, Fred aldudar familiakoa --euskara poliki mintzo du-- eta Danielleren aitatxi Orondrizkoa, Erroko bailara nafartarrekoa. Ezteien ondoko besta Gure Euskal Etxean, Basque Cultural Center-en, egin dute, bozkarioz, euskal kantuz eta Jean Flesher eta Amerikanuak taldearen erritmo euskal-amerikarretan dantzari. Zorion biziak senar-emazte berrieri eta heien familia eta laguneri!